Ramri lama harsatna awm hi sukiang turin hma lak kan tum – K Sapdanga

Ruihhlo luh thinna, khawchhak lam ramria harsatna awm chu sukiang turin sawrkar hma lak a tum dawn tih Home minister K Sapdanga chuan a sawi.
Champhai district fangtu Home minister hian Thawhlehni khan Zokhawthar a tlawh a. Helai hmuna awm Land Custom Station, Immigration Checkpost bakah Lipui leh Bethel Refugee Camp a tlawh. Khawtlang hruaitute nen an inkawm bakah sawrkar official leh raltlante a kawm a ni.
Sawrkar tharin ni 8 vel chauh office an la kai chungin, Krismas muang taka kan hman theihna turin engtia hmalak nge tha ang tih an ngaihtuah a, Mizorama ruihhlo luhna hmunpui lam fang hmasak an ti ta tih a sawi. “Ruihhlo do turin kan tanrual a ngai dawn a, thahnemngai taka thawhho puiah kan sawm che u a ni,” a ti.
Mizoram sawrkar chuan ramri ah insumdawnna kalphung mumal zawk neih a duh a, hemi kawngah hian hmasawnna a awm zel a beisei tih a sawi a. Ramri ah eng harsatna nge awm thin tih a thawia an lo hriat ve te a hmuna en tul an ti tih sawiin, “Tunah hma lak nghal rum rum theih loh mah se, kan theihna zawnah mipui harsatna sukiang turin hma lak kan tum dawn a, mipui harsatna benga kan lo hriat thin a taka rawn hmuh hian min ti bengvar hle a ni,” K Sapdanga hian a ti.
Home minister tawiawmtu, minister Lalnghinglova Hmar chuan refugee camp an tlawhnaah, raltlan kan unau, kan thisen zawmpuite kan thlahthlam thiang loa, sawrkarin a theih ang anga chhawmdawl zel a tum dawn tih a sawi. A bak thildangah chuan sawrkar laipui lam nena rel fel ngai thil tam tak a awm avangin hma lak chhunzawm zel an tum tih chief minister-in lo sawi tawh tih a sawi bawk.
Home minister hian refugee camp pahnihah hian Krismas leh kumthar an hmanna atan sawrkarin relief fund a ruahmansa atangin sumfai a hlan a. Bethel leh Lipui Refugee Camp-ah hian raltlan 1093 an awm a ni.
Commerce & Industries department report danin, Zokhawthar Land Custom Station hi 2015 March 15-ah hetihlaia Commerce & Industries changtu Union minister of state Nirmala Sitharaman chuan a hawng. Tunah hian Customs official-ten thutchilhin, Special Assistance to State for Capital Infrastructure (SASCI) sum vaibelchhe 15 hmangin tihchangtlun hna thawh mek a ni. Tiau lui kan na lei tihchangtlunna tur project cheng vaibelchhe 14.5 pawh Mizoram sawrkarin Ministry of External Affairs pawmpui turin a thehlut tawh.