Daily Newspaper

Ramri vangin Assam Assembly rorel thei lo

8

Assam assembly-ah inhnial buaina a thleng a, Mizoram nena ramri buaina chungchangah opposition leh rorel lai MLA te tawngkain an inbei nasa hle a, Speaker chuan minute 40 lai House chu a chawlh tir hial a ni.

Opposition tin te Congress, All India United Democratic Front (AIUDF), Bodoland’s People Front (BPF), CPI(M) leh Independent MLA te chu House well-ah kalkhawmin Central Bureau of Investigation (CBI) emaw National Investigation Agency (NIA) ten an chhuichian ngei an phut thu an sawi a. Placard heng ‘ramria chengte humhim rawh’ tihte chu an keng bawk.

Rorel lai BJP legislator-te pawh heng opposition-te hmachhawn hian House Well-ah an pungkhawm ve bawk a ni.

Pawl pahnihte hi assembly secretary dawhkan chauhin dangin kut zungchala inkawka inau chungin an dawhkante an bengin an chum nasa hle bawk.

Speaker Biswajit Daimary chuan theihtawp chhuaha boruak tha siam a tum chungin awmzia a neih loh avangin minute 40 chhung House a titawp hial a ni.

A hmain Congress MLA Kamalakhya Dey Purkayastha chuan House-a thusawina a neihah ramri buai chu October 2020 khan Mizoram atanga intan tiin a sawi.

“Hemi chungchang hi Union government hnenah pawh kan hriattir a ni. Chumi hnuah pawh, eng vangin nge Assam police-in nunna a chan? Tu thiam loh nge?” tiin zawhna a siam a ni.

He zawhna hi chhangin Parliamentary Affairs Minister Pijush Hazarika chuan Assam leh Mizoram chu ram hran pahnih ni lovin Indian state hnuaia state inthenawm mai an ni tiin a sawi a.

“Inbiakna hmangin kan buaina chinfel tur a ni a, chumi tur chuan hmalakna kalpui mek tawh a ni. House hnena ka hrilh duh erawh kum 1974-a Congress rorel atangin ramri buaina avangin mi 34-in nunna an chan tawh” tiin a sawi.

He mi hnu hian opposition member tinte chu an thutna atanga thovin an au ta nuai nuai mai a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy