Daily Newspaper

RAMRI VRS ALL PARTY

14

Mahmuaka Chhakchhuak

Ramri chungchang ngaihtuaha Political Party leh tlawmngai pawl hrang hrang mai bakah Kohhran hruaitu lam thlenga sawihona hun neiin July 14, 2021 khan Assembly Conference Hall-ah Dy. Chief Minister hoin neih a ni a, Hime Minister, Assembly Speaker leh Minister thenkhatte bakah Serlui bialtu MLA leh Hachhek bialtu MLA te tel bawkin Chief Secretary bakah Official mi pawimawh tak tak an tel bawk a ni.

Opposition Party atangin rawtna a lut tha viau nia hriat a ni a, Boundary Committee dinte, Boundary Commission din tura sorkar laipui nawrte, State pahnih CM te inbe tura rawtnate, Border Development chungchangte, Ramri-a duty te thuam that chungchang bakah State châk lakna zau zawk ngaihtuahte chu rawtna langsar pawl a ni. Dy. CM leh Home Minister te ngei pawhin heng rawtna te hi lawm takin an pawm niin a hriat a, a tihhlawhtlin dan tur erawh la ngaihtuah chhunzawm tur ni awm tak a ni. Heng rawtna lut zingah hian Opposition Party pahnih atang chauhin thehluh a ni awm a, Congress Party chuan an thu thehluhah Mizoram leh Assam ramri chinfelna tùra harsatna lian tak pakhat kan neih chu kum 1986-a MNF leh Sorkar inremna (Accord) ziakah khan North Eastern Areas (Re-organization) Act, 1971 pawm a ni kha a ni a. Kum 1966 atanga kum 20 chhung rambuai kan nih a, khaw khawm te, inthahna te, India sipai leh MNF sipaite hlau reng renga kan awm te, hmasawnna engmah thawk thei lova, zirna lam thlenga harsatna kan tawh thin te kha a lo reh thei dawna kan hriat khan, “Sai ram chhuak ni mah ula, sakhi in rawn kah pawhin kan lawm em em ang,” tiin kan lo lawm che u a. Duhthusam phak lo mah ila, remna leh muanna kan duh ém avang khan kan sir tluk ta kha a ni ber a. Mizoram mipui leh MNF te’n remna leh muanna kan duh ém avanga inremna in lo ziak tawh chu kum 2019 July thla khan cabinet Meeting chuan he inremna (Accord) thu ken kalh tlat hian Mizoram ramri chu kum 1875 ramri zawk in pawm thar leh tak thu kan hre leh ta mai a. Hetianga mahni pawm tawh phatsan leh hnihnè tùr ai chuan kum 1986 inrem dawn laia Congress Party-in ramri chungchanga Documents pawimawh tam tak kan pek che u hmang khan a hun lai khan lo nawr ula chuan thil pawh a awlsam deuh mahnà tiin an ziak a. ZPM lam chuan Cabinet meeting-in 1875 ramri chu kan ramri dik tak a nihzia an lo pawm tawh chu a lawmawm a, pawm ringawt lova a taka luah ngei tura hma la tur leh 1875 ramri tihlanna official map siam turin Mizoram sorkar kan phut a ni, an ti ve thung a.

A dawt lehah chuan Ramri chinfel nana Court-a kal hi tha kan ti lova, kan duh lo bawk a ni. Mizoram leh Assam Chief Minister te pahnihin dawhkan kila sawifel hi ram leh mipui tan a that ber kan ring tlat a ni tiin Congress Party hian an thu thehluhah hian an ziak lang leh a, he thu bawk hi ZPM lam pawhin sawiin tun hnaia buaina chhuak chungchangah Assam Chief Minister Himanta Biswa Sarma chuan ni tin press mite a kawm a, Mizoram lam min dem char char a. Kan Chief Minister erawh a ngawi tlat si a, Assam Chief Minister thu-hla chauh hretute chuan, Mizoram hi min thiam lo hle ang. Kan Chief Minister hian press mite hmangin ram mipuite leh ramri vela chengte thlamuanna thu han au chhuahpui ve rawh se an ti ve thung a. Heng bakah hian ZPM te hian Assam Chief Minister khan, Mizoram Chief Minister nen an inkawm hunah ramri chu an sawi fel thei mai tur ang khan a sawi a. Kan Chief Minister hian remchangah la se, Assam Chief Minister chu ramri chungchang sawipui turin vawiina kalkhawmte hian ngen ila tiin thu an thlen bawk a.

Thudang chu la awm tho mahsela heng thu pahnihte hi kan sorkar lam pawhin a ngaih pawimawh a rinawmin mipui lam pawhin kan ngaihven bik ni pawhin a hriat a. Chief Minister pahnihte hi khunkhan taka inkawmna neiin ramri lama buaina leh harsatna a thlen tawh lohna atan inbiakna nei ngei sela, chumi tur chuan kan CM ngei pawh hian Press Conference te neiin mipuia puanzar ngei pawh a pawimawh viau a ni. Tin, Congress Party hian engvanga India sorkar leh MNF te peace accord sign leh July 8, 2019 nia Cabinet of Minister-in a pawm tak 1875 BEFR hi rawn sawi nge an nih tak tih hi ngaihtuah ngai tak niin a lang. Kum 1986-ah India sorkar leh MNF te inbe remin Peace accord sign a ni a, chuta ramri atan an pawm chu North Eastern Re organization Act 1971, 1972 a implement tak kha a ni. Chutih lai chuan tun hnaiha ramri lamah buaina leh harsatna a thleng neuh neuh a, kan zirlaite ngei pawhin silaimu an tuar hial a nih kha. Vawi khat chauh ni loin tum engemawzat ramriah buaina a thlen takah chuan kan sorkar chuan July 8, 2019 ah Council of Minister meeting neiin Mizoram leh Assam ramri atan 1875 BEFR an pawm thu an pass ve thung a, hei hi 1986 kuma hming an sign hnan nen chuan a inan si loh avang hian Congress Party hian Dy. CM hoa meeting-naah hian sawi chiang turin kan sorkar hi an phut a ni.

1986 hnu hian kum rei tak kan lo kal leh tawh a, tunhma lamah ngei pawh khan Congress Party ngei pawhin hei hi an sawisel lem lo (an pawm tihna erawh a ni kher lo ang) ni awm tak a nih laiin tun hnaia Cabinet Meeting-in a pawm chin a rawn sawi fiah tak nen hian alo inan chiah si loh avang hian an rawn sawi thar leh chauh tihna pawh a ni thei awm e. Eng pawh chu nisela, mipui lamin kan ramri chin tia kan pawm theih ngei tura kan sorkar ngei pawhin a sawichian vat chu a ngai hmasa phawt mai a, tuna All Party meeting-na hmuna thu thehluh ang hian hmalakna hmasa atan nei ngei sela thil tha tak a ni ngei ang. Nakin lawkah chuan Politics inbeihna hmanruaah ngei pawh ala hman theih dawn nitein a lang a, chuvangin thil tul loa Party inepna a thlen lohna atan leh kan ram chin tia tupawhin kan tan theihna turin kan sorkar hian a puan chian vat a, Official Map pawh a siam ngei hi a tihmakmawh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy