Daily Newspaper

Ramria duty police-te hman tur puan in pe

20

Assam nena ramria buaina awmnaa duty Mizoram Police-te hman turin Congress Thalai chuan puan in (tent) leh camp light an pe.

Congress Thalai hruaitute, an president Dr. Lalmalsawma hoin Ningani khan Vairengte tlawhin Assam leh Mizoram ramri innghirnghona avanga Mizoram Police duty-te tan puan in (tent) leh eng chhit tur (camp light) a tulna apianga hman turin Vairengte Police Station-a awm mek Kolasib SP Vanlalfaka Ralte hnenah an hlan. Congress Thalai president hian ramri-a duty-te mamawh phuhruk vek thei lo mah se, engemawchen tala an awlsam zawk nan puan in panga leh camp light a pe a ni.

“Ramri buai avanga engkim huama thawktute kan fak a, kan police-te inpekna a chhuanawm kan ti takzet. Assam leh Mizoram ramri buaina a awm avangin kan Mizo puite huan thlai a chhe nasa hle a, hei bakah hian Assam Police-te avangin Mizo pa ngei mahni huana hun rei tak feh thei tawh lo an awm nual bawk. He buaina hi sawrkar hian a rang lamin chingfel se kan duh a ni,” Dr Lalmalsawma hian a ti. Vawiin thlenga North East Democratic Alliance (NEDA) anga Mizoram sawrkar tiama hmarchhaka BJP thurualpui khai-khawmtu chu an convener Himanta Biswa Sarma, tuna Assam chief minister a nih thu sawiin, NEDA convener leh Assam CM ni bawk leh Mizoram chief minister Pu Zoramthanga-te chu dawhkan khat kil an nihna angin, tun buaina pawh an pahniha rang takin an chinfel an phut tih a sawi a ni,.

Assam rama 3rd Bn IR awm mekte chu Mizorama indaih lohna avangin koh haw an tul tih Congress Thalai President hian a sawi a. “Tuna sawrkar lai hi sawrkar laipuia rorellai BJP kaihhruai National Democratic Alliance nena dawhkan khat kilho an nih angin, Assam-a 3rd Bn IR-te hi a rang lamin Mizoramah ko haw turin kan phut a ni,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy