Kolasib leh Cachar district thuneitute chuan ramria sipai leh police duty chu tih tlem hret hret pawimawh an ti.
Thawhlehni khan Dholai Police Station-ah Cachar leh Kolasib district-a sawrkar thuneitute chu ramria ralmuanna a awm chhunzawm theih nan thawh ho dan tur relin an thukhawm a. Kolasib district bawrhsap John LT Sanga hi district SP, DFO, SDO (Civil) pahnih, addl SP leh District IPRO-ten an tawiawm.
Kolasib bawrhsap chuan Kolasib leh Cachar district chu ramri thui tak intawm an nih angin, a tul apianga inpuitawn tur leh boruak muanawm siam tura thawh hona tha a awm a pawimawh tih a sawi a. Thutkhawm hmasaa rel tawh bawhzuina hrang hrang a sawi bawk. Assam leh Mizorama ramri intawm district hrang hrangte inkara boruak a ralmuan zel theihna’n DC leh SP-te inkar a inbiakna kalpui thin a nih bakah Hailakandi district-a Border Festival buatsaih a nih thu te, Hailakandi leh Cachar district-a thuneitute chu Kolasib district-a Chapchar Kut 2023 lawmnaah an tel thu te a sawi a ni.
Ramriah zinmiten harsatna an tawh lohna’n ramria sipai leh police duty-te chu a tul anga tih tlem hret hret a pawimawh thu te, ramri kana ruihhlo leh dan loa ramsa tawlh awm thin veng tura thawhho dan tur te, ramria state pahnih Forest department-ten hma lak an tum apiangin harsatna a thlen loh na’n inhrilhhriat hmasak thin a pawimawh thu te sawi a ni. Mizoramah MLA inthlanpui nei tura inbuatsaihna kal mekah Cachar district thuneitute chuan a tul apianga puih an inpeih reng tih an sawi a. Tunhnaiah Assam registration number nei Alto car thahnem tak Kolasib paltlanga Mizoram lo lut an awm thin chu uluk zawka thlithlai a pawimawh tih sawi a ni bawk.
Cachar lam hi bawrhsap Rohan Kumar Jha, SP Numal Mahatta, DFO leh addl. SP te an ni.
Ramria sipai duty tih tlem hret hret tul an ti
