Ramriin hnam a then thei lo: Information Minister
Information minister Lalruatkima chuan ramriin hnam a then thei lo tiin a sawi a, “Ramin ri nei mah se, ramriin hnam a then thei lo a, hnam inpumkhatna a tichhe thei lo,” a ti.
Minister hian Ningani khan Siaha District-a Tipa ‘V’ (Tuipang ‘V’)-a Chhimtuipui Group Young Mizo Association (YMA) Inkhawmpui vawi 37-na a hmanpui a, ramriin hnam a then thei lo tia sawiin, “Zo hnahthlakte chu ram inrelbawlnaah khawvel ramriin min daidang mah se ram danga kan unaute nen chhiat thatah inngaihven a, inunauna kan lantir zel hi a lawmawm hle a ni,” a ti.
Myanmar leh Bangladesh atanga ram chhung buaina avanga sahimna zawnga Mizorama lo tlan lut Zo hnahthlak unaute tlawmngai pawl hrang hrangin an lo kuah khawm dan leh sorkarin a theih ang anga a lo tuamhlawm danah hei hi chiang takin a lang a ni, a ti bawk.
Group YMA Inkhawmpui thupui ‘Ram leh hnam humhalh’ chu thupui pawimawh tak, ngaihthah thiang lo a nih thu a sawi a, ram leh hnam humhalh turin zirna uar, ruihhlo laka inthiar fihlim leh fa hrin tamte chu hmalakna tur pawimawh tak a ni, a ti.
YMA member mipate chu pasal tlak leh chhungkaw enkawl tlak nih tum tur leh nulate pawh Zo hnahthlak fa chauh hrin tum turin a fuih a, chu chu ram leh hnam humhalhna kawng pawimawh tak a ni, a ti.
Mizote chu hnam tlawmngai, hnam taima, hnam rinawm leh hnam huaisen kan ni tiin a sawi a, inkhawmpui palaite chu chu nihnaa chianna chu hawnpui a, an ni tin nunah a taka nunpui turin a chah a ni
Ramriin hnam a then thei lo: Information Minister
![](https://theaizawlpost.org/wp-content/uploads/tap_logo-min-large.jpg)