Serchhip Deputy Commissioner chuan kangmei laka ramngaw leh nungchate him theih nan ramvah khapna thupek a chhuah a, ‘Serchhip district chhunga silai nei zawng zawngte dan lo anga silai nena ramvah khap tlat a ni’ tiin.
Silai lawm hnam kan ni, ti ila, kan sawi sual awm lo e. Pi leh pute atang tawhin, silai hi a hlu a, an roh hle a, a chhan pawh sa leh ral laka invenna tha tak, invenna mai bakah sa leh ral beihna atana an ralthuam tha leh hlu ber a ni. Silai ngaihhlutna hi tun lai thleng hian kan la chhawm a; mahse tunah chuan license neih a ngai tawh a, license nen silai tha pui pui nei an tam tawh hle.
Dan anga silai kawl tur chuan, license neih duh chhan chu ‘mahni invenna’ (self defence) atan tih a ni deuh ber a. Mahni inven a ngaih chhan pawh, chhan tha tawk tak a tling tur a ni. Mi a hausak viau chuan rawk leh suam a tawk thei a, chumi laka lo invenna atan emaw, intihbuai boruak thlengah thah leh intihnat tuma invauna thleng thin laka lo inven nan emaw tih a ni thin. Ramsa or nungchate kah nan mimal hnenah silai license hi pek chhuah a ni ngai awm lo ve.
Bawrhsap thupek atang hian silai nena ramvah chu ‘dan kalh’ tihna a ni a; license neih leh neih lohvin awmzia a nei lova, silai nen ramvah loh hrim hrim mai tur tihna a ni. Silai nena mi a ramvak a nih chuan ramsa kah tur a melh dawn tih a chiang sa a, chutih rualin meizu mi an nih phei chuan tihluih vang pawh ni lo, tihpalh thilthua ram tih kan a lo awl a, thal khaw ro lai, kangmei chhuah awlsam hun lai a ni a, ramvah hi khap rih awm tak pawh a ni.
Kan hriat angin kumin February ni 6 khan District Wildlife Crime Control Sub-Unit, Khawzawl District chuan sapel tum mi panga leh an silai ken ulhbun panga an man a, Dan tlawhchhanin cheng singhnih leh sangnga theuh chawitir an ni a.
Hetiang deuh thak thaka kan kal loh chuan, tunlai thiamna behchhana silai siamchhuahte hi a tha hlawm tawh si a, silai nena ramvak thinte hian kar lovah nungchate hi an suat rem thei mai dawn a; chu chuan ecological balance a tichhe vek ang a, chu chu mihringte tan tawrhhlelhawm tak a ni dawn a ni.
District tin hian hetiang thupek hi chhuah hlawm se, Wildlife Crime Control hote nen, forest guard lam nen tanghovin thawhhona tha tak siam ni se, ramngaw leh nungcha venhim kawngah awmzia thui tak a neih theih a rinawm a ni.
Ramvah khapna
