Ran natna chi hnih umbona turin India sawrkar chuan beihpui a thlak dawn a. Mizorama he beihpui thlakna tur khuhhawnna chu Thawhtanni khan Selesiha AH & Vety department hmunah neih a ni.
Ran hri/natna thenkhat vangin ram pawna sa leh bawnghnute thawnchhuah a tisukuk thin a, ram economy thlengin a nghawng buai thin tih sawrkar laipui chuan hriain, Department of Animal Husbandry and Dairying hmalaknain, ram chhunga ran natna leng thin – Foot and Mouth Disease (FMD) leh Brucellosis te thunun leh nuaibona tur atan, National Animal Disease Control Programme (NADCP) hi a kalpui a, state leh UT tina hmalakna tur a ni.
NADCP-in a tum ber chu, India rama ran – bawng, lawi, kel, beram leh vawk maktaduai 500 chuang chu FMD vaccine pek leh Brucella vaccine hmanga lawi leh bawng la, thla 4 atanga thla 8-a upa maktaduai 36 te hri danna pek a ni a. Kum 2025-ah chuan heng natna chi hnihte hi control hman a, kum 2030-ah chuan nuaibo vek tum a ni.
Ram puma he programme thawhna senso tura hisap chu kum 5 chhung atan cheng vaibelchhe 1265 niin a vai hian sawrkar laipui tum tur a ni.
Mizoramah pawh AH & Veterinary Department chuan NADCP on FMD & Brucellosis’ khuhhawnna hi AH&Vety secretary Lalzarmawii hoin an hmang a, Cattle Breeding Farm Selesih-ah a bul tan nan ear tag leh vaccine te pek nghal a ni.
He programme tipuitlinna atan state level-ah AH& Vety secretary chairman-na hnuaiah State Implementing Unit a awm a; secretary tho chairman-na hnuaiah State Monitoring Unit a awm leh a, district tinah District Monitoring Unit awmin chairman chu DC an ni.
(THE AIZAWL POST – Tualchhung)
Full>> ePaper Subscribe
