Ranchaw siamna leh ar awpkeuna tlawh
Tanhril Ramrikawna ranchaw herna hmun – Animal Feed Plant leh ar note awpkeuna hmun – Zoram Poultry Development Society Hatchery Farm chu Nilaini khan Animal Husbandry & Veterinary minister Er Lalrinawma chuan a tlawh.
Mizoramin sa leh artuia kan intodelhna’n department-in hma a lo lak tawh na chuan rah tha a chhuah nia a hriat thu minister hian sawiin, heng hmuna thawktute chu heng kawngah kan intodelhna’n theihtawp chhuah zel turin a chah. Animal Feed Plant chuan ran vulhtu mamawh zawng zawng phuhru lo mah se, phailam atanga lo lut ranchaw aia a man a tlawm zawk avangin ran vulhtu tan malsawmna a ni thei a, ar note awpkeuna hmunhma tihlen hunah ar vulhtuten broiler chitha leh mantlawm zawka an lei theihna a siamsak ngei a beisei tih a sawi a ni.
Animal Feed Plant hi kum 2003 vela din a ni a. Kum 2018 khan NABARD hnuaia RIDF XX sum, nuai 523.53 sengin ran chaw herna hmun khawl leh hmunhma dangte bun belh a ni. Animal Feed Plant-a ranchaw herna khawl pahnih hian nikhatah ran chaw quintal 120 vel an herchhuak thin a, layer leh broiler chaw chi thum ve ve, vawk chaw leh bawng chaw pawh an siamchhuak a ni. Sawrkarin a revolving fund nuai 30 a pek atangin Animal Feed Plant hi amah leh amah a inchawm a, a enkawl turin department-in Management Committee a siam a ni.
Zoram Poultry Development Society (ZPDS) INDBRO Poultry Hatchery Farm, Tanhril hi AH & Vety department farm hlui, Regional Broiler Chick Farm hmunah NABARD RIDF XVII project hmangin bul tan that a ni a. May 2015 khan hawn a ni a. ZPDS Farm hi amaha a din theihna’n kum 2015 khan AH&Vety department-in capital fund/ revolving fund nuai 40 a pe a. He fund hi parent stock lei nan, archaw lei nan, electric /tui bill, staff hlawh, damdawi leh farm inrelbawlna a tul apiang thawhna’n hman thin a ni.
ZPDS Hatchery Farm tilian tur hian 2020 July 20 khan NABARD (RIDF) ah kar khata ar note 40000 thar theihna tur project thehluh a ni a, hemi kum November 17 khan Planning department hnuai Special Assistance to State For Capital Expenditure (SASCE) ah project dang thehluh leh a ni. Heng hna hi thawh mek a ni a, zawhfel thuai beisei a ni. Tun thlengin he farm hian artui 25,70,740 leh arte 16,98,100 a thar chhuak tawh a; sawrkarah revenue Rs.32,85,679.89 a chhunglut tawh a ni.
Ranchaw siamna leh ar awpkeuna tlawh
