Lengteng bial chhunga rangva in la neilote neih tir vekna tur scheme, ‘Hlunsanga Malsawmna Scheme’ chu Thawhlehni zing khan Kawlkulha Hlunsanga (L) inah Lengteng bialtu MLA Dr L Thangmawia’n a hawng. He scheme bul tan nan Rural Development minister Lalruatkima’n rangva thahnem tak a ruahman sak tih puan nghal a ni.
MLA chuan sawrkarin UT hun lai atangin khawsak harsa zawkte tan scheme tam tak duangin hma tam tak a la tawh thin a. Tun thlengin in dinglai, a chung rangva la neilo an la awm nual a, chu’ng chu phase-I ah dah an ni tih a sawi.
BDO Ngopa leh Khawzawl te a ngen angin survey an neihah a bial chhungah in ding lai 28-in rangva in chung an la neilo a, he survey-a telh hmaih rangva inchung neilote telh belh an ni dawn tih Dr L Thangmawia hian sawiin, “Party thliar loin hma lak a ni dawn a, kuminah phase-I hi zawh hman tum a ni. He scheme-in a huam tel tho rangva inchung tuiek thlak pawh hemi dawta kalpui tur a ni,” a ti.
Rangva chung khuh tur hian kaihhnawih dang tam tak a awm avangin he scheme hlawhtlinna’n khawtlang hruaitute leh tlawmngai pawl, a bikin YMA puihna a ngen tih a sawi a ni.
He scheme hnuaia a hmasa ber atan in hnih chung chu Kawlkulh VC kaihhruaiin rangvaa thlak tura tihfel nghal a ni a, a tahtawlin survey-a tarlante inchung rangvaa thlak tum a ni. He scheme hi kum 2023 atanga 2025 thleng kalpui tura ruahman a ni.
Scheme hming tumtu Hlunsanga (L) hi Zofaten zalenna an puannaa hming ziahhnantute zing ami a ni.