Hmunpui rama mau/rua chinna pilot project kalpui mekah kung sing 8 an phun atangin kung sing 5 chuang chu a puitling ngei dawn tih a buaipuitu Ex-Mizo National Army Multi-Purpose Cooperative Society chuan an sawi.
Tunhnaia an hmunhma tlawh nia insawi mi thenkhatin, mau/rua chin hi a hlawhtling lo nia an hmuh thu leh sum siamna mai nia an ngaih thu an sawi chu a dik tawk lo tih Ex-Mizo National Army Multi-Purpose Cooperative Society hruaitute chuan sawiin, “Kal chu an lo kal ngei a, an kalna hi mimalin an chinna, an enkawl zui tak vak loh a ni a. Keini chinna hmun hi an rawn thleng loa, rawn thleng ngei se kan duh zawk hle a ni,” Society secretary V Ramhlunsanga chuan a ti.
He hmunah hian Rawmi leh Brandisii tiak an ching a, hectare 170-a zauah tiak 80000 an phun a, chhiar vek rem tawh lo mah se, sing 5-6 inkar vel chu a puitling tih an sawi ngam thu leh, a thi leh ta te pawh hi a thara hnawhkhah leh zel tum a ni tih an sawi.
Kum 2020-a bul tan tum ni mah se, khua a khen avangin an tan thei lawk loa, 2021 July khan an phun a, heng rua hi a puitlin na’n kum 4 te a duh avangin tunah chuan, hlawhtling tih tura kung puitling hmuh tur ala awm lo hrim hrim tih a sawi bawk.
Heng rua an chin hi a puitlin huna hman dan tur pawh tun atangin ruahmanna an siam lawk a, hmarchhak state thenkhata an hman dan te an theih ang angin an zuk zirchiang a, a raw thel leh paih ngaite hi cement factory-a hman tur charcoal briquette siamna atan te, a hriak hi vinegar siamna atan te, a tuai hi sawngbawla ‘rawtuai tin’ siamna atan te ruahman an tum tih an sawi a. Rua hi a puitlin hunah a hmunah hian industry dina engemawchen sawngbawl lawka phurhchhuah tuma an inbuatsaih tur thu te Society chairman C Zama chuan a sawi a. A kaihhnawih sawrkar department-te pawh tun atangin an dawr chho mek zel a, an chin tan atangin Horticulture department mithiamten an vil reng thu te an sawi a ni.
Raw chinna hmunah kung sing 5 chuang puitlin beisei
