Daily Newspaper

Rawlthar tha ber Arnold

11

Khawvela tualchhung league ropui leh harsa ber ang hiala sawi thin English Premier League, 2019-20 season-a rawlthar tha ber thlanchhuah fel a ni ta a. Liverpool defender tha tak Alexander Arnold chuan a vawihnih nan rawlthar tha ber chawimawina a dawng.

Premier League Young Player of the Season chawimawina dawng thei tur hian kum 23 chin hnuai lam player pariat chhawpchhuah an ni a, chungte chu; Jack Grealish, Aston Villa, Mason Greenwood (18) – Manchester United, Dean Henderson (23) – Sheffield United, Anthony Martial – Manchester United, Mason Mount (21) – Chelsea, Christian Pulisic (21) – Chelsea, Marcus Rashford (22) – Manchester United leh Alexander Arnold (21) – Liverpool te an ni.

EPL-a rawlthar tha ber thlan tura chhawpchhuah pariatte hi fan ten vote hmangin an thlang zui leh thin. Tun tumah hian United player pathum; Marcus Rashford, Mason Greenwood leh Anthony Martial te chu a sang zual zingah an tel a, United hmelma Livgerpool player Alexander Arnold an tluk phak ta lo vek thung.

EPL a rawlthar tha ber chawimawina dawng nawn lehtu Arnold hian season liam ta khan EPL match zawng zawng a khel kim vek a, vawi 38 a khel. EPL-ah hian assist vawi 13 ngawt a nei a, defender zingah assist ngah ber niin record thar a siam a, goal li a thun bawk. Fifa Club World Cup leh Premier League-ah Reds an champion theih nana player thawhhlawk tak a ni a, EPL-ah clean sheet vawi 12 zet a neihpui hial a ni. Mi tam tak chuan Cafu hnu lama wing back tha ber ang hialah an ngai. Premier League-a rawlthar tha ber chawimawina a dawn bakah hian EPL 2019-20 season-a player tha ber thlantura chhawpchhuah zingah a tel bawk a. A rual hian Reds tana a khelhpui Sadio Mane leh captain Jordan Henderson te EPL player tha ber thlan tura chhawpchhuah zingah an tel ve bawk.

Arnold-a’n rawlthar chawi-mawina a dawng leh tak vanga Liverpool an lawm em em laiin Manchester United erawh an lawm lo hle thung. United forward Anthony Martial chuan EPL-ah goal 17 zet a thun tling a, EPL-a a season tha ber a hmang. Martial ang bawk hian Marcus Rashford pawh a che tha viau bawk. Hetiang deuh tho hian England rawlthar Mason Greenwood a chetha tak zet a, EPL-ah goal 10 lai thun in, ani ang rual zingah season khatah a aia goal thun tam an tam lo hle. United rawlthar chetha tak tak zinga pakhat talin dawng lova defender goal li thuntu in a dawng daih mai hi an United lam chuan na an ti ve det niin a lang.An rawltharte an chetthat em vangin an vuipui a nih pawhin a awm e!

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy