Rawng inang hmang tura tih taxi-ten nghah lawk an ngen

Rawng inang hmang tura tih taxi-ten nghah lawk an ngen
Sawrkarin two wheeler taxi rawng a vara thlak vek leh stricker rawng inang bel tura a tih chu nghak hlek tura ngen a ni.
State Transport Authority (STA) chuan two wheeler taxi zawng zawng rawng inang leh colour sticker bel dan inang hmang vek turin a hriattir a. Lirthei rawng atan a var thlan a ni. He thu hi kumin February 17-a chhuah a ni a, hriattirna chhuah atanga thla 6 chhunga lirthei rawng thlak fel vek turin a ti.
Aizawl Two Wheeler Taxi Association (ATTA) chuan he thil hi an zawm duh lo hrim hrim lam niloin, senso hautak dan tur leh a hun chep lutuk chu siamrem sak turin sawrkar hotute an ngen.
The Aizawl Post-in a biakpawhnaa ATTA hruaitute sawi danin, February 24 khan Transport minister Vanlalhlana an hmu a, STA lam sawipui leh phawt tura a rawn angin an sawipui a, ziakin an thlen bawk. STA-in kumin August ral hmaa rawng thlak vek tura a tih chu replacement huna scooter var (sa) an thlan theihnan nghah phalsak turin an ngen.
“Two wheeler taxi ho hi kum 5 chuang vek kan ni tawh a, lirthei thara thlak (replace) a hun chho tan hrim hrim tawh. Heta kan thlak hunah a var hman a nih theihnan min nghak turin kan ngen a ni,” thudawnna chuan a ti.
Permit hmu hmasa ho phei chuan tunhnaiah lirthei an thlak nual a, registration tharah ‘AA/AB/AC’ an ni tawh hlawm a. An lirthei thar tam zawk hi rawng a var a lo ni lo lehzel nen, STA thuchhuak anga kal tur chuan an sum sen a ‘double’ dawn lutuk tih a sawi.
Rawng var an hman vek dawn chuan, lirthei document-a a rawng inziah dan ang nena inmil lo tur an tam a, chumi thlakna atana senso, rawng thlakna leh sen ngai dang nen Rs. 10000 vel a ngai niin an chhut tih a sawi bawk.
STA secretary an hmuhnaah STA thutkhawm leh hunah an thu thlen hi ngaihtuah atan an lo chhawp tur thu in a lo chhang a, thutkhawm hun tur erawh sawi lawk theih a la ni lo tih a lo hrilh tih thu dawn a ni.
Hetihlai hian tunhnaia two wheeler taxi-a ‘AA/AB/AC’ registration nei ho chu an lirthei hlui a thar thlak an ni hlawm a, tun sawrkar hnuaiah permit pek thar a awm lo niin AATA hruaitute chuan an hria a ni.