Daily Newspaper

RB Leipzig in United an hnawtchhuak

9

Thawhleh zan khan champions League group match khelh chhun-zawm a ni a. Group E, F, G leh H te an inching fel. Group harsa bera ngaih Group H chu chinfelin a awm ta a, Premier League club lian Manchester United chu RB Leipzig muala tlawm United an mualpho va, last 16 lut zo lovin an tla.

Thih leh dam kara leng, khual-mualah point hmuh ngei ngei ma-mawh United hian Old Trafford-ah singa fai ngawta an lo sawp tawh RB Leipzig an tlawh a, hnehna chang nawn lehin, last 16 leh theih beiseina lian tak an nei. Team naupang, hma-sawn em em si Leipzig mualah bul an tan chhe ta viau thung. Si thum zet an phurh hnuin huaisen takin inlan zui mahse an si phurh an sut zo thei lova, uiawm takin an tlawm.

German club RB Leipzig hian an mualah bul an tan tha tak zet a, minute hnihna lekah Angelino chuan ding lam sir atanga ball kal tha tak chu lei hrutah kawh zetin a hlap lut pawp a, hmahruaina goal a thun. Hma takah goal an thun vangin Leipzig hi inrin-tawkna leh phur takin an inlan zui a, an mikhualte an chhaihbuai hneh zui viau. Minute 13-naah Amadou Hai-dara chuan lei hrulah kawh zetin a hlap lut leh pawp a, an goal hnihna a thunin, an mikhualte an chungtlak leh zual.

Chawlhlawk hmain Leipzig an khel tha tak zet a, hlauhawm an siam mawlh mawlh laiin, United in hlauhawm an siam hleithei meuh lo thung. German team hian an goal thumna chiang zetin an thun zui leh a, VAR rawn a nih hnuin offside tiin hnawl a ni ta thung. Hei bakah hian goal thun theihna hun tha an neih chu uiawm takin an hlah hlauh bawk.

Chawlhlawk hmain an khingpuite khan lo hle mahse chawlhlawk hnu la-mah tha zetin United an inlan ta thung. Ball a chang tam a, goal thun theihna hun tha an nei chho tan ta bawk. Ding lam sir atanga ball vawrh luh tha tak chu goal-ah chantir mai theih a nih laiin uiawm takin an hlah. Hemi hnu lawk hian Bruno Fernandes chuan tha zetin free kick a pet a, a goal ngei tura ngaih a nih laiin goal kham a per leh ta hlauh a, Leipzig an him nawn leh.

Vanneihthlak taka an him hram hram hnuin RB Leipzig bawkin goal an thun leh ta zawk. Minute 69-naah vei lam sir atang ball kal tha tak chu Justin Kluivert chuan hnaite atangin a pet goal a, an goal thumna a thun. He goal luh danah hian United si nghak David de Gea chuan nat a hlauh vangin a tih tur ti tawk lova ngaiin United midfielder hlui Paul Scholes chuan a sawisel zui nasa hle. Huai taka hmachhawn nise goal lo thei mai turah a ngai a, huai taka inlan hun takah lehlam a hawi daih mai chu dawihtlak tak, mahni intihtetna mai nia a ngaih thu a sawi.

Minute 79 na thlenga si thum fai zet hnu fual zawk an nih vangin United dinhmun a chhe tak zet tawh a. Tla chiang tawh ang hiala ngaih an ni. Hun harsa takah huaisen leh tha taka inlan thin United kha an la danglam tam lova, hun tawp dawn hnaiah huaisen taka inlan in, an khingpuite an nawr buai ta hle thung.

Minute 80-naah khel tha pangngai tak Marcus Rashford chuan penalty a hlawhchhuak ta nge nge. He penalty hi Bruno Fernandes chuan chiang zetin a pet goal a, an si phurh a sut then. He goal hian United a fuih phurh a, huaisen takin an inlan zui theih phah. Goal an thun atanga minute hnihna lekah Paul Pogba tauh tha zet chu Ibrahima Konaté chuan an lamah a dang goal a, United si phurh a sut then sak.

Goal hnih an thun hnuin an si phurh sut zawh ngei tumin tan an khawh zui a, minute 13 chhung enawmah an chantir. United in an si phurh sut ngei tumin tan an khawh a. Leipzig in an goal venhim hram an tum ve thung. RB Leipzig hi point thum mamawh zawk an nih vangin an mualah chak ngei ngei an tum a, fimkhur taka inlan zuiin an hmahruaina an vawnghim thei hlauh a. Old Trafford-ah 5-0 ngawta an ngam loh United chu 3-2 hneh let in, point thum hlu tak an hlawhchhuak a, last 16 an inhlangkai ta a ni.

United hnawkchhuaktu RB Leipzig hi kum 2009 , May ni 19 a din a ni a, kum 11 leka upa an ni. Team naupang te mah nise hma an sawn chak em em thung. Bundegliga-ah team tha ber pawl an ni der tawh a, season liam ta khan champions league-ah semi final an thleng hial a ni. Bayern Munich pawh 3-3 a inhnehtawkpui hlimhlawl an nih vangin United in an hneh lo pawh hi thil mak a ni lem lo.

United manage Ole Gunnar Solskjaer chuan team anga an thawh ho that tawk loh thu a sawi a. Chu chu ama mawh liau liau a nih thu a sawi tel bawk. UCL-ah last 16 lut zo lova an tlak leh tak vangin Solskajer hma lam hun a chiang lo leh zual hle a, ban a ni nge nge a rinawm ta hle.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy