B Leipzig mualah City
Zanin zanlai dar 1:30 hian UEFA Chammpions League last 16 khelh chhunzawm a ni leh dawn a. Premier League champion Manchester City chu Red Bull Arena-ah lenglutin, RB Leipzig an hmachhawn dawn.
English club lian Manchester City leh German club thang duang RB Leipzig te hi champions league-ah vawihnih an inhmachawn tawh a, vawi khat ve ve chak zawkah an tang. Kum 2021 khan champions league-ah group khatah an awm a. Etihad Stadium-a an inhmachhawn tumin an mualah Manchester City in 6-3 ngawtin hnehna an chang. December ni 12, 2021-a an inhmachhawn tumin RB Leipzig hian Red Bull Arena-a an mikhual City hi 2-1 in an lo hneh ve thung. EPL hian vawi khat an tlawm tawhna mualah zanin hian hnehna chan ngei an tum dawn.
Red Bull Arena-a lenglut tur City hi inrinni zan khan Nottingham Forrest lakah mak tak maiin an chak zo lova, Forrest nen 1-1 a an inhnehtawk vangin City hian EPL-a hma an hruaina an hloh phah. City in an khingpuite an hneh zawh loh lai hian RB Leipzig erawh chuan Mimuala an khingpui VfL Wolfsburg
chu si thum fai ngawtin an sawp ve thung. Team naupang, hmasawn chak tak RB Leipzig hi Bundesliga season kal mekah pangana an ni mek a, champion theihna hun tha an la nei.
Zanin dar 1:30 vek hian Inter Milan chuan San Siro-ah Portugal club lian FC Porto an mikhual dawn. Inter hian Porto lakah record an nei tha a, vawi nga an inhmachhawn tawhah vawi thum chak zawkah an tang a, vawi khat chiah tlawm zawkah an tang.