Santiago Bernabeu atanga world class player rual an kalbo zawh tak duak hnua Spanish giants goal thun khawl ni chho ta mek Jude Bellingham chuan Inrinni zanah La Liga hmahruaitu team tan goal khat khung leh mah se mualneitu Betis lamin an siphurh an sut a, he thu buatsaih lai tleng hian league table-ah Real Madrid hian hma an la hruai chang chang.
Nizan result tarlan hman lohah table-a pahnihna luahtu Girona chuan Barcelona khelmual an lut a, an chak chuan Real lehpelin an hmahruaina an neikir leh thei ang.
Inrinni game-a goal hmasa zawk kha second half tir lam minute 53-a Brahim Diaz siamsak atanga Bellingham tihluh niin, a club thar Real Madrid tana game 18 a khelhah England midfielder hian goal 16 a tilut tling chiah a, mahse, kha goal khan mikhual team a chakpui zo lo.
Minute 66-ah Aitor Ruibal chuan penalty pawn atanga goal pui tak khungin Real Betis siphurh a sut a, goal dangluhbelh loin team pahnih an inhnehtawk a, Real hmahruaina a derthawng, pathumna luahtu Barca laka Giro an chak chuan Carlo Ancelotti team hi pahnihnaah bawk an chhuk leh ang.
Kum 20 mi Bellian La Liga bikah match 14 akhelh tawh atangin goal 12 a puitlin tawh a, assist tum hnih nei tawh bawkin, thla hmasa mai khan Real tana Champions League game khelh hmasak vawilia goal khung vek thei hmasaber nihna record pawh a lo siam hial tawh a ni.
Birmingham City player hlui hi kumin nipui insuan lai khan Real Madrid chuan Borussia Dortmund atangin euro maktaduai 103 (£88m) laiin an lei a, an tisual lo rih khawp mai.
Midfield-a a thawhhlawk bakah season kal laiah hian Carlo Ancelotti team tana inelna hrang hrang belhkhawma goal khung hnem ber a ni mek a, amah hnaihbertu Brazil winger Rodrygo lakah goal kua zetin a sang tawh.
Real Betis 1-1 Real Madrid
