Real lakah United an tlawm
United States lama season thar inbuatsaihna kalpui mek Europe club lian pahnih Real Madrid leh Manchester United chuan Nilaini zanah friendly match khelin, Spanish giants hi sihnih faiin an chak a, England midfielder Jude Bellingham chuan a club thar tana a inlan vawihnihnaah goal a thun.
Houston, Texas-a pre-season friendly inkhelah hian kum 20 mi Real Madrid midfielder Bellingham chuan tan atanga minute rukna lekah La Liga club goal hmasa zawk khungin, named man of the match-a thlan a ni zui nghe nghe.
English midfielder Jude Bellingham hi Spanish cham-pion chuan pound maktaduai 88-in an lei a, a club thar tana a match hnih khelhnaah United debutant keeper Andre Onana dan zawh loh goal hmangin Real tana a goal hmasaber a khung.
NRG Stadium-a mipui 67,801 zet pungkhawm hmaah hian Joselu chuan hun tawp hma minute hnih chiah awm tawhah Spanish club goal hnihna leh he match-a goal hnuhnung zawk ni zui ta a thawh ve leh.
Goal hmasa zawk thawhtu Bellingham khan Pathianni liamta khan AC Milan lakah a club thar tana a game hmasaber khelin, United ep zawngin khelmual a lut zui leh a, goal thunin, Santiago Bernabeu club-ah a dinhmun a sawhnghet nghal tluka ngaih a ni!
Inkhelh banah English player chuan khawvela player tha ber ber fuankhawmna khawvela club lian ber bel chungin hmachhawp tam tak a nei tih a sawi a, amah leh a team-mate-te lakah mite beiseina a sang lo thei lo tih a tarlang tel.
A khelh that dan azirin Real-a a man zat hi pound maktaduai 115 laia sang chho tur a ni a; a club tharah hian attacking diamond lamah position thar luahin, a goal ropui thun hmangin Bernabeu-a inelna tak tak hmachhawn thei tur class a nei tih a pholang nghala ngaih a ni.
Kum 2020 khan Bellingham hian Birmingham City atangin United training ground lama enchhinna a lo hmachhawn tawh a, chutih laia rawlthar beiseiawm ni mek chu Old Trafford-a a kal zui ngei rinna a len hle laiin Borussia Dortmund lamah a kal ta daih a; tunah khawvela club ropui leh lian berte zinga mi Real Madrid-in duh takin an lalut a, enchhin a lo hmachhawn tawhna club lakah goal a tilut zui ta a ni.
Real Madrid boss Carlo Ancelotti chuan England international hi Real-ah number 10 mawhphurhna a pe nghal a, ropuina tam tak khum turin a kokiah mawhphurhna lian tak ngha a ni chho tan dawn a ni.
La Liga club laka an tlawm hnuah United manager Erik ten Hag chuan striker dang lei belh an mamawh thu sawichhuak nghalin, Nilaini zanah attacking leh central midfielder ni kawp Mason Mount, Marcus Rashford, Scott McTominay leh Alejandro Garnacho-te’n goal thun tura an hun tha hmuh an bawhpelh fai vek a, Ten Hag hian goal bawh lama rin ngam zawk tur striker dang la mamawh belha a inhriat thu a sawichhuak ta a ni.
Dutch coach hian an hun neih ang ang hmangtangkai chunga goal thun thei leh player ei tling zawk an mamawh thu hi zep buangbar duh loin, tun dinhmunah hel lai mek pawh an neih thu leh an mamawhna phuhru zo ngei tur player dik tak an sengluh thuai a beisei thu a tarlang tel.
Atalanta thuam inbel mek kum 20 mi leka upa Rasmus Hojlund chu Ten Hag-a hmachhawp lian ber a ni mek a, mahse, tun thleng hi chuan Denmark forward man turah club pahnihin inremna an tihfel thawm hriat a la ni lo.
Nilaini zanah khan darkar khat an khel tling tihin Ten Hag chuan team a siksawi nual a; a tir lama inhliam kum 18 mi lek midfielder Kobbie Mainoo dinhmun dik tak hriat theih a la ni lo a; inkhelh banah United player dang McTominay pawh a bai ve bawk.
Red Devils hian an tlarhma thuamchak an tumna kawngah Serie A club Atalanta leh Denmark national team forward ni mek Rasmus Hojlund pawh an thlithlai tih hriat a ni a, kum 20 mi lek Danish professional footballer hi an senglut dawn em tih pawh a la chiang lo.
Pound maktaduai 47-a an sengluh kum 27 mi goalkeeper Onana khan a club thar tana a inlan vawikhatnaah goal hnih tlawng a chhuah a, David de Gea a thlak zo tak tak dawn em tih hriat a har rih!
Real lakah United an tlawm
