April ni 9 Champions League quarter-final first leg-a Manchester City hmachhawn mai tur Real Madrid chuan Europe game pawimawh an khelh hmaa an match hnuhnungber turah Pathianni zan khan sihnih faiin Bernabeu mikhual Athletic Bilbao an hneh a, La Liga table-a an hmahruaina tinghet zelin, khelh riat chiah awm tawhah anmahni hnaihbertu Barcelona nen point riatin an inthlau zui zel.
Bilbao laka Real goal hnih hi Rodrygo thun ve ve niin, Brazil forward goal hmasa zawk hi tan atanga minute riatna leka Brahim Diaz siamsak atanga a tihluh niin, second half laihawl minute 73-ah hremna tuar zo hlim England midfielder Jude Bellingham thawhrah atangin a goal hnihna a hlawhchhuak leh.
Mualneitu team kha chiang lehzuala chak thei tur an nih laiin Federico Valverde goal tur chu Athletic Bilbao keeper Julen Agirrezabala chuan dansakin, uiawm taka Aurelien Tchouameni thelh kan hmuh hnuah Brahim Diaz pawhin goal ban a petper ve bawk.
Inrinni Copa del Rey final-a Mallorca hmachhawn tur Bilbao pawhin goal khat chauh an la chhuah laiin an siphurh sutna hun remchang an hmu a, mahse, Inaki Williams-a goal lawm tur chu Andriy Lunin chuan a tisukuksak hlauh.
Bilbao hian an mikhualna hmunah point thawkchhuak zo lo mah se table-ah palina an luah chhunzawm zel a, point khatin pangana Atletico Madrid nen an inthlau.
Hnehna an chan piahlamah Real tan zan tha niin, an Brazil defender inhliam Eder Militao chuan nikum August ni 12 hnu lama a vawikhatna atan khelmual a lut a, mahse, a luh hun hi minute 92 a nih tawh avangin a khel rei hman lo.
European champion tum 14 ni tling thei awmchhun Real Madrid leh Manchester City-in Champions League quarter-final second leg an khelh hun tur chu April ni 17 a ni.
Real Madrid an kal zel
![](https://theaizawlpost.org/wp-content/uploads/Clipboard01-467.jpg)