Daily Newspaper

Real Madrid-in hmahruaitu nihrual

11

Pathianni zanah 3-1-a mualneitu Eibar hnehin Real Madrid chuan pa-hnihna dinhmun luah chungin hmahruaitu Atletico Madrid point hmuh zat an nihrualpui a, mahse, Diego Simeone-a team aiin Zinedine Zidane-a team hian game hnihin an khel tam tawh zawk.

Karim Benzema lan-sarh zanah French for-ward hian goal khat khungin goal hnih a siamsak a, season kal laiah league goal sarih a thun tling der tawh.

Benzema hian minute rukna lekah Rodrygo siamsak atangin goal hmahruai a thun a, minute 13 an khelh tlin rualin Frenchman hian Luka Modric-a goal tur a siamsak ve leh a, mahse, darkar chanve an khelh tlin hma lawkin captain Kike Garcia chuan Eibar siphurh pakhat a sut then a, half-time-ah Real hian 2-1-in hma an la hruai tho.

Second half-ah team pahnihin goal thun belh theihna hun remchang an siamchhuak nual ve ve chungin an hlawhtling mai thei lo a, goal a lut zo dawn lo nia a lan hnu hun pekbelh tir lamah Benzema siamsak atangin Lucas Vazquez chuan chiang zawka Real Madrid chakna goal a tilut a, Zidane-a team hian Real Sociedad lehpelin pahnihna an luah chho a, hmahruaitu team aia game hniha khel tam chungin Atletico chu point-ah an nihrual.

Nizan result tarlan hman lohah Atletico hian Real Sociedad an luh-khung ve nghal a, Nilaini zan hian Los Blancos pawhin Granada an hmachhawn dawn a, La Liga hmahruaitu dinhmun hi a nghet lo hle rih a ni.

Tualchhung leh Europe lam thlengin Real Madrid-in season bul tan fuh lo mah se an ke pen a fuh chho mar leh tan tawh a, ti hian, inelna hrang hrangah a zawnin game nga an chak tling ta a; Eibar an luhkhung zanah inkhel tir lam thunun hneh viau mah se rim taka thawkin an hmahruaina an humhim tluan thei hram a, hun pekbelha an hmahruaina an nemnghet thei tawk a ni.

Thawhlehni inkhel dangah Celta Vigo chuan sihnih faiin an mikhual Alavés an hneh a; Granada pawhin chuti zat bawk chuan an mikhual Real Betis lakah hnehna changin, Cádiz mualah Getafe pawhin 2-0 hnehna an sualchhuak.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy