Daily Newspaper

Real Madrid-in hmahruaitu nihrual

12

Tualchhung leh Europe-ah beisei angin bul tan fuh zo lo mah se hliamin a tihbuai Zinedine Zidane-a team chuan ngai an awh chho leh tan mek a, Champions League lamah group hmahruaitu ni chungin knock out round hmasaber an lut tawh a, La Liga lamah pawh Thawhlehni zan khan an mikhual Athletic Bilbao lakah 3-1 hnehna changin, table-ah pathumna luah chhunzawm bawk mah se khelh inangah hmahruaitu Real Sociedad leh pahnihna Atletico Madrid nen point inang, point 26 an neiho ta a, an elpui lian pahnih tan thin thia thut a har tawhin a rinawm!

Spanish giants hian inelna hrang hrangah a zawnin match li hnehna an chang chho leh mek a, an season fuh lo pawh a dik zawngin a inher leh bawih tawh.

Thawhlehni zan inkhelah Karim Benzema chuan second half-ah goal hnih thunin, Athletic lakah bik hian La Liga goal 13 a tilut tling chiah a, team dang zawng zawng aiin French striker hian he team lakah hian league goal a tilut tam.

Bilbao club hian first half-ah an lama goal lut tur an dang tluan thei teuh hle a, mahse, chawlhlawk hma hun pekbelh minute khatna a kal mek laiin Toni Kroos chuan Vinícius Júnior siamsak atangin home team hmahruaina goal a thun zui ta hram a, half time-ah Real hian sikhat faiin hma an hruai.

Second half tan hnu lawkah Ander Capa chuan a vawihnih goal zawnnaah an siphurh sutna goal a tilut a, a shot hmasa zawk chu Thibaut Courtois-a’n a dansak zet a, a vawihnihna erawh Real keeper tha mi hian an dang zo ta bik lo a ni.

1-1 a nih hnu hian hun pawimawha Los Blancos chhanhim thintu Benzema a inlar a, second half laihawla Carvajal-a siamsak leh hun pekbelha Modric-a thawhrah atangin Spanish giants chakna goal hnih a tilut a; mikhual team hian first half minute 13-na leka an player pawimawh Raul Garcia red card chawi kha an tuar ve bawk a tih theih ang.

Real Madrid goal-veng Courtois hian tha zetin Mikel Vesga goal tur a dansak bawk a, Madrid khelmualah hnehna chang zo lo mah se hun rei zawk a kim loa khel chungin goal khat an thun a, goal dang khung theihna hun remchang pawh an siamchhuak nual a, Real keeper a paltlang zo lo mai a ni.

Tarlan tak angin, Spanish La Liga table-a hmahruaitu Real So-ciedad leh pahnih Atletico Madrid-te nen Real Madrid hian point inang an neiho ta a, an zingah hian Atletico-in an khel tlem ber a, game 11 chauh la khelin, an elpui lian pahnih hian match 13 an khel tling tawh thung a, Argentine coach Diego Simeone-a team tan hmahruai theihna hun remchang a inhawngzau mek.

Nizan inkhel result tarlan hman lohah a sang pathum aia point kua laia hniam tawh Barcelona chuan hmahruaitu Real Sociedad an mikhual a, he inkhel hi Sociedad tan an hmahruaina kengkawh zui zel thei tura inkhel pawimawh a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy