Real Madrid kutah Copa del Rey title

Real Madrid kutah Copa del Rey title
Rodrygo goal hnih thun hmangin Bernabeu club chuan Osasuna laka 2-1 hnehna nen an club chanchina a vawi 20-na atan Copa del Rey trophy an chang a; kum 103 zet club an kal hnua an trophy lian hmasaber tur Los Rojillos tia kohduat hlawh Osasuna-in an bawhpelh leh.
Seville khaw final-ah hian tan atanga minute hnihna lekah Brazilian Rodrygo chuan a chipui Vinicius Junior siamsak atangin Real hmahruaina a thun a, half time thlengin goal a luhbelh lo.
Second half tir lam minute 58-ah Lucas Torro chuan The Little Reds siphurh sutin a team tan beiseina a siamsak zet a, minute 20 la awmah Rodrygo bawkin Spanish giants hmahruai nawnna goal a khung leh a, kum 2014 hnu lama a vawikhatna atan Real Madrid kutah Spanish cup trophy a lut.
Rodrygo goal hmasa zawk second 106-naa lut kha kum 17 chhunga Spanish cup final-a goal lut rang ber niin, Estadio de La Cartuja khelmuala an team zuiluttu Osasuna fans 25,000 dawn laite khan hun pekbelhah auna tur hun remchang an hmu leh thuak a, mahse, Dani Carvajal chuan counter attack atanga Kike Barja goal tur a lo dansak hlauh a, goallibe atanga a hnawlchhuah kha goal-ah chantir thei se Osasuna history a dang dawrh mai thei!
An club centenary an lawm tawh chunga title lian la sualchhuak ve lo Los Rojillos tum a ruh a, target fuha ball thawnluh pawh ngah zawkin, vawinga an fuh laiin Carlo Ancelotti team-in vawithum chiah an fuh a, mahse, target an fuh chhunah an ke a dik zawk a, chu chu an nihlawhpui ta a ni.
Copa del Rey title an lak fel hnuah naktuk zan Champions League semi-final first leg-a Manchester City an sut tur lam hawiin Real an inbuatsaih zui nghal.
Champion lai team hian Bernabeu-a English club an luhkhung hunah kaihza tha na avanga chawl Luka Modric chhawr theih tawh an inbeisei.
Osasuna game-ah khan Vinicius Jr pawhin Real starting XI a luahkir a, goal hnih a thawh bakah veilam sir atangin hlauhawm a siamchhuak sek bawk.
Real Sociedad-a an tlawm hnu khan Ancelotti chuan Inrinni Spanish cup final-ah player panga a siksawi a, Barcelona kuta La Liga title a luh ngei a rinawm ngheh tawh laia an trophy la beisei theih pakhat a hmin ta phawt a ni.
Real Madrid hi an game khelh hnuhnung vawithumah vawihnih ngawt an tlawm a, tarlan tawh angin, La Liga lamah point 14 ngawta hmahruaitu Barcelona nen an inthlauh tawh avangin top flight title humhim zo lo tura ngaih an ni a, Copa del Rey zawhah Champions League hi an innghahna lian a ni leh mek.
Osasuna lakah hun pumin ball zaa 65 dawn an chang a, an hmahruaina goal hmasa zawk hum zo lo mah se nuamsain inkhel an thunun tluan-chhuak a; an goal khatna siamchhuaktu Vinicius khan midangte goal tur pawh chhawpsak nual mah se a team-mate lamin an chhawrtangkai zo lo.
Real Madrid tan David Alaba chuan free-kick atangin goal kham a chhuihper a, Vinicius pawhin penalty box kilsir pawnlam chiah atangin goal ban pawn chiahah a chhuihchhuak ve bawk.
Chakna goal hnih thawhtu Rodrygo chuan Movistar Plus hnenah a hun tawn sawiin, “Kum 22 mi lek ni chunga Real Madrid thuam inbel chunga ka la hlawhchhuah ve loh awmchhun title ka chang thei hi ka hlim takzet a ni.
“Tunkar chhung zawng khan engtia rei nge he trophy hi Real Madrid kuta a luh loh tih kan sawiho nasa a, ka la champion ve lohna a nih avangin kei hian mimal takin ka thlahlel zual a, chutih laia chakna goal hnih ka khung thei hi ka tan chuan zan special bik a ni hliah hliah.”