Site icon The Aizawl Post

Real Madrid lakah Barcelona chak phawt

Real Madrid lakah Barcelona chak phawt
Ningani zan 2023 Spanish Copa del Rey semi-final first leg-a Eder Militao ‘own goal’ chu Santiago Bernabeu-a Spanish team ropui pahnih thenhrangtu niin, an match hnuhnung pahniha tlawm ve ve Barcelona-in sikhat faiin mualneitu Real Madrid an hneh.
He inkhelah hian ball chang tam zawk chung leh goal thun theihna hun remchang pawh siamchhuak tam zawk chungin mualneitu Real-in minute 90 chhungin Barca lamah goal an khung zo lo a; Europa League lama Manchester United hneh loa La Liga lama team tenau Almeria laka tlawm bawk Catalan team-in vawithum tlawm zawn pum-pelhin an mikhualnaah hnehna pawi-mawh an sualchhuak a; Xavi Hernandez-a team tan Madrid khawpuia chak kha inrintawkna neihkirlehna atan pawh pawimawh hle tura ngaih a ni.
April ni 5 khian Nou Camp lamah second leg an khel leh dawn a, final lut turin Barca dinhmun a duhawm zawk rih a; return leg khelh zawh hnua an tlang chuan Athletic Bilbao leh Osasuna inchinfel hnua dingchang zawk zawk nen tournament hmawr an bawk tawh ang.
Tarlan tawh angin, Bernabeu inkhela goal lut awmchhun leh mikhual chakna goal ni zui ta kha first half minute 26-a an lam goal-a Militao tihluh palh niin, he game-a Barca attack hmasaberah Franck Kessie shot chu Real keeper Thibaut Courtois chuan a dang zet a, mahse, ball perchhuak chuan Militao hnung a per a, an lam goal-ah a lut.
Sikhat faia hma an hruai hnuah Xavi team-in ngawrh takin goal venhim lam an buaipui chhunzawm nghal chat a, awmze nei leh inthununna tha tak nena defending an khelh hlawkpuiin Nou Camp second leg atana inhmakhaw suihna tha an hlenchhuak thei.
Barca hi La Liga lamah hmahruaitu ni mek bawk mah se an game khelh hnuhnung pahnihah an talbuai a, Europe atanga an tlak hnuah karliamta tawpah khan tualchhung league-ah an han tlawm zui leh zat a, Ningani zan Bernabeu game kha an tan inkhel pawimawh a ni.
Barcelona midfielder hlui Xavi chuan Almeria an hneh loh tuma a line up siksawiin, lut hmasaah mithar panga a dah a, a starting team-a tlarhnung luahtu pali phei kha chu league-a an tlawm tuma mi ni lo vek a hmang.
Tarlan tawh thin angin, hmahruaitu an nihna Spanish top flight lama game sarih ngawt an chak zawn hnuah a indawtin match hnih tehreng an tlawm a, Spanish capital-ah khan ‘pressure’ sang tak nen Barcelona-in bul an tan a; chutah an fans tana hlauhthawn ang ngei ngeiin mualneitu team khan bul an tan hlauhawm zawk.
A tir lam minute 15 chhung chu Real Madrid-in inkhel an thunun hneh hle a, mahse, a zawna vawithum tlawm pumpelh mamawh Barcelona lamin zawi zawiin midfield an thunun chho a, an defensive game plan pawhin duhthu-sama thain hna a thawk bawk!
Barca centre-back Ronald Araujo chuan right back-ah mittlung takin a hna a hlenchhuak a, englai pawha ven ngai ni thin Vinicius Jr. chu che hlei thei loin a siam a, tlarhma lama Real sahuai Karim Benzema meuh pawh khawhar takin a mal tal fo!
An tum anga an chet theih loh avangin Madrid player-te an talbuai fo a, an zaidamna pawh an hloh awl lo a, tihsual pawi takin a zui tak avangin Barca chakna goal awmchhun ni ta an chhuah phah hial a ni.
Madrid midfielder Eduardo Camavinga-a back pass nangfuhin Ferran Torres chuan rang zetin Franck Kessie tan ball a thawn a, Kessie hian Real keeper zawnah tak chhuih mah se ball letleh chuan Militao ‘own goal’ a hringchhuak zui ta tho a ni.
Kha goal luh rual khan assistant referee chuan offside a phar ngei a, mahse, VAR replay-ah Kessie a fihlim chiah chiah a; hun puma an siphurh pakhat sut zo lo Madrid-in Barcelona khaw lamah hna hautak zawk an hmachhawn phah dawn.
Second half-ah mikhual team-in uar zawkin goal ven hna an thawk a, mualneitu team khan inkhel thunun viau bawk mah se an siphurh sut turin hun remchang an hmu bar lo.
Chawlhlawk hnuah ball 70% thuak chang mah se Real khan goal zawnah vawikhat lek pawh ball an thawnlut zo lo a; chutih laiin hmahruaitu zawk Barca lamin minute 71-ah an khungbelh teuh viau a, Kessie shot chuan Real goalkeeper pel hman tawh mah se Ansu Fati chuan engtin tin emaw a lo dang hman hram a ni.
Substitute Rodrygo chu Real tana ‘chance’ nei tha ber niin, hun tawp hnaih tawh lama a long-range strike chu goal ban sirah a thlawkchhuak hlauh!
Barcelona captain Sergio Busquets thusawi hian a hmawr bawk dawn ila:
“Kha aia inkhel thunun thei tura ball chan tam deuh theih kha a chakawm khawp mai a, mahse, level sang takah hnehtu nih tumin kan fight a; anni lam khan ball chang deuh chawt mah se chance an siamchhuak tam thei bik lo a; second leg atan kan chan a tha zawk a, kha kha a pawimawh takzet a ni.”

Exit mobile version