Rawlthar ngaihven hlawh tak Yan Diomande chuan khawvela football club hausa leh hlawhtling ber Real Madrid a zawm dawn hnai a, Los Blancos nen hiam miman inremna an nei fel tawh.
Kum 19 mi Ivory Coast winger Diomande hian season liam ta khan RB Leipzig tan a khel tha viau. Bundesliga-ah RB Leipzig tan hian goal 12 a thun bakah assist vawi 8 zet a nei bawk. A khelh that em vangin Bundesliga-a rawlthar tha berah thlan a ni nghe nghe.
Bundesliga-ah season tha tak a hman hnuin World Cup 2026-ah Ivory Coast tan player pawimawh a ni. World Cup-ah ngaihven hlawh tak chunga in lan Diomande hian Ivory Coast tan vawi li khelin goal thun theihna hun tha vawi 10 zet a siam. Che chhe lem lo viau mah se The Elephants hian last 32-ah Norway an hneh lova, last 16 lut zo lovin an tla.
World Cup atanga an tlak hnuin Europe a club lian hrang hrang ten lak tumin an ngaihven nghal. Ngaihven zual zingah EPL club lian Arsenal leh Liverpool te pawh an tel. EPL club lian ten ngaihven bawk mah se amah hi chuan UEFA Chamions League champion Paris St-German zawm a chak ber thung.
PSG hian June thla khan £69m senga Diomande lak tumin an dawr a, RB Leipzig in an hnar nghal. PSG hian Pathianni khan £102.5m senga lak tumin an dawr leh a, German club hian an hnar nawn leh niin an sawi. |um hnih ngawt PSG an hnar hnuin La Liga club lian Real Madrid an rawng lang thut a, €135 million ($153.8M) vel bawrin an la fel thei dawn niin a lang.
Real Madrid nen mimal inremna an neih tak vangin Diomande awt em em tu PSG an inhnukdawk zui nghal. Real Madrid leh Diomande te hian mimal inremna nei tawh bawk mah se club pahnihte man leh mualah an indawr zui leh ang a, RB Leipzig leh Real Madrid te hian inremna an neih fel thuai a beiseiawm.
Winger tlan chak leh ball thiam Yan Diomande hian hma a sawn chak hle. Kum 2022 khan Ivory Coast chhuahsanin USA a pan a, DME Academy a zawm. Kum 2023 khan Scottish club lian Rangers zawm tumin trial a hmachhawn a, a tlin loh vangin USA lamah a kir leh. Kum 2025 khan La Liga club Leganes a zawm a, hemi kum vek hian German club lian RB Leipzig a zawm zui leh a, RB Leipzig atang hian khawvel hriat a lo hlawh ta a. Tun atanga rei lo teah khawvela football club hausa leh hlawhtling ber Real Madrid player a ni tawh hial dawn a ni.
Real Madrid leh Diomande an inrem
