Site icon The Aizawl Post

Real tlawm zana chak Barca

Pathianni zanah hmahruaitu Bar-celona-in sithum faia an mikhual Sevilla an sawp laiin pahnihna luahtu Real Madrid chu Mallorca mualah sikha faiin an tlawm a, La Liga table-ah Catalan team hian point riatin hma an hruai fal ta.

Barcelona 2-0 Sevilla
Nikum May thla hnu lama a team tana goal la khung leh ta ngai lo Jordi Alba chuan Nou Camp inkhelah mualneitu team tan second half tir lam minute 58-ah Kessie siamsak atanga goal hmahruai thunin, minute 70-ah Rapinha thawhrah atangin Gavi chuan a khung belh a; minute kua an khel leh tihah goal hmahruai thuntu Alba chuan Brazil winger Rapinha goal tur chhawpsak ve lehin, an mikhualnaa point hlawhchhuak zo lo Sevilla-in table-ah 16-na an luah a, point hnih chiahin relegation zone chungah an thu.

Barcelona chak zan hian tan atanga minute lina lekah kheimit hliam avangin an captain Sergio Busquets chuan khelmual a chhuahsan a, February ni 16 Europa League play-off first leg-a Manchester United an mikhual hunah an chhawr thei dawn em a hriat rih lo.
Tarlan tak angin, Pathianni zan inkhel dangah title race-a an elpui lian ber ni leh mek Real Madrid chuan Catalan team nena point hnih leka an inkar tihzim theihna hun remchang bawhpelhin Mallorca lakah an tlawm.

Mallorca 1-0 Real Madrid
A tir lam minute 13-na leka defender Nacho ‘own goal’ chu hun pumin Los Blancos-in an sut thei lo tluan thak a, Barca nena an inkar a hla zual sauh.

Estadi Mallorca Son Moix-a an tlawm hma match liah Real Madrid hian Mallorca an hneh fai vek a, Pathianni zanah pawh harsatna lian tawk loa chak zui leh thei tura beisei an nih laiin a tir lama an defender chetsual chu goal hmangin an chhanglet zo lo tluan a, Spanish champion hian an title kawl lai humhim turin hmabak an nei ko sawt.

Real goal chhuahna kawnga thawhhlawk Vedat Muriqi ball tauh chu Real Madrid defender Nacho chuan an lam goal-ah a khaklut palh a, kum 2019 hnu lama a vawikhatna atan Mallorca-in Real hnehin, kha chakna kha match 14-a Spanish giants an vawihnih hnehna chiah a ni nghe nghe.

Tun season kal laiah Los Piratas hian Madrid club lian dang Atletico Madrid pawh home-ah bawk lo hneh tawhin, Pathiannia an point thum hlawhchhuah leh nen La Liga table-ah 10-na thutin, point kuain relegation zone an hlat tawh a; tun kha an khelmual bika match li an chak zawnna ni tawhin, 1-0 vekin an chak a ni.

Second half tir lam minute 59-ah Real Madrid-in an siphurh sut theihna hun tha hmuin, home goalkeeper Predrag Rajkovic-a’n Vinicius Junior a tihtluk hrinchhuah penalty chu Mallorca midfielder hlui Marco Asensio chuan goal-ah a chantir zo lo.

Real Madrid tan tun season league-a an vawihnih tlawmna niin, hmahruaitu Barcelona nena an inkar chu point riatah a chho ta a ni.
Real hian hun pumin inkhel an thunun zawk a, goal thun theihna hun remchang pawh vawi duai lo neiin, penalty hial an hlawhchhuak a, mahse, an hneh than team lakah tuntum chu point an thawkchhuak zo lo.

He inkhela goal awm chhun tiluttu leh an pawl tlawmna thlentu ni nghal bawk Nacho chuan Movistar Plus hnenah, “Ball lo kal tauh turin ka chechhuak a, vanduaithlak takin veilam chunglam kil sirah a lut palh a, hei hi football a ni. Penalty kan han thelh leh ta zel a, clear chance pawh kan hmu nual a, kan hlawhtling zo tlat lo a; game harsa tak niin, mualneitu team khan tha takin goal an veng a, point thum hloh ngawt mai hi a lungchhiatthlak duh khawp mai,” a ti.

Mallorca thli thaw vuk vuk hnuaiah Real Madrid-in hliam avangin an forward Karim Benzema leh defender Eder Militao an chhawr thei lo a; an vanduaina belhchhah turin goalkeeper Thibaut Courtois chuan warm-up laiin a thal a tina ve leh zel a; coach Carlo Ancelotti chuan kum 23 mi Ukrainian keeper Andriy Lunin chhawrin, a pawlte’n inkhel an thunun hneh hle zanah Lunin hian hna hautak hmachhawn bar lo mah se Nacho tauhpial a dang hman lo a, number one goalkeeper awm loh hlana hmingthat a tumna a puitlin zo lo!
Mikhual team khan hun puma ball 75% changin, Mallorca khan minute 84-a target an fuh bak Real goal zawnah ball an thawnlut zo lo a; Ancelotti team pawh khan Mallorca goal lamah goal thun tumin tum 20 zet ‘attempt’ nei bawk mah se Asensio spot-kick thelh bak ‘target’ fuh an nei bik lo!
La Liga champion hian nizan khan Club World Cup-ah mualneitu Morocco luhkhungin, Nilaini zan hian Rabat khawpuiah Egypt club Al Ahly an su zui leh ang.

Pathianni zan La Liga inkhel dangah Girona chuan sikhat faia an mikhual Valencia hnehin, Real Sociedad khelmualah Real Valladolid chuan 1-0 hnehna an chang ve bawk.

Exit mobile version