Record siama title hlawhchhuak PSG
League game khelh khat la nei chungin Inrinni zanah Paris St Germain tan League 1 title a hmin a, French top flight-a champion ngun ber nihna malkhalhin title 11 an lakna chiah a ni.
An coach kalchhuak ta Mauricio Pochettino hoin season liamta khan PSG hian kum 1981 daih tawha French top flight title 10 la tling thei awm-chhun Saint-Etienne re-cord nihrualin hun ropui an chuangkai a, kuminah head coach thar hoin re-cord siamtu thar an ni ta.
Strasbourg khuaa Stade de la Meinau khel-mualah PSG hian 1-1-in mualneitu Racing Stras-bourg an inhnehtawkpui a, point thum chauh hmuh tur awm tawhah table-a anmahni hnaih bertu RC Lens lakah point liin an sang a, lehpelh theih an ni ta lo.
Inrinni zanah Lionel Messi chuan second half tir lam minute 59-ah Paris St Germain hmahruaina goal khungin, Kevin Gameiro chuan Racing siphurh sut bawk mah se 1-1 draw hi Christophe Galtier-a team tan champion-na’n a tawk.
He result nen Paris club chuan point 85 an kawl a, inkhel dangah Lens chuan sithum faiin an mikhual AC Ajaccio hneh ve bawk mah se PSG an dang zo lo.
France football thunun engang mah se Paris St Germain hian kuminah pawh an awh ber Uefa Champions League trophy an sualchhuak zo leh ta chuang lo a, season tawp rualin an superstar pakhat Lionel Messi chuan a chhuah-san dawn tih a nemnghet tawh bawk.
Season kal laiah PSG team chakna ngulpui ber ni leh bawk mah se Kylian Mbappe pawh hian a contract neih lai zawh huna kum khat dang cham belh leh theihna an bilh tel angin kum 2025 cham thlen theihna a la tinung (activate) lo tlat mai a, hei hian Paris fans ngaih a titha lo a, Europe-a hlawhtling thei lo an nih bawk avangin kum 2024 hian a chhuak ve thut dawn em ni tih zawhna a piang mek!
French Cup pawh la zo ta lo PSG tan Mbappe an la kawl hram hram thei hi lawmna tur a nih hmel a, he Frenchman hian league goal 28 thun tling tawhin, season tawp lama boo khum hlawh Lionel Messi leh hliamin season chawhnu lam a tihbuai Neymar-te an innghahna tlak loh lai pawha PSG damna a ni.
Ziak lamah chuan PSG tlarhma lama Mba-ppe, Messi leh Neymar thawkho hi he planet-a attacking trio tawrh-hlelhawm ber an ni chiang bang a, mahse, Europe club inelna lian berah hei leh chen an hlawhchham ta a, midfield atanga chawmtu an neih that tawk loh an tuar a tih ve theih bawk ang a, Marco Verratti chuan beisei a pha lo tluanchhuak a, an tlarhma pawh a hriam tur angin a hriam tawk zo loa ngaih a ni.
Europe-a manager tha berte zinga mi Carlo Ancelotti kha kum 2013-ah banin, khami hnu khan PSG-ah hian coach lut leh chhuak an insulpel zut zut a ni ber a, kan hmuh leh hriat ang khan Laurent Blanc, Unai Emery, Tho-mas Tuchel leh Mauricio Pochettino tihhte han ruai kual ngial mah se Europe-ah team an hlawhchham-pui zel a, Christophe Galtier pawh hian engtia rei nge a daih dawn tih hi zawhna a ni leh tawh!
Record siama title hlawhchhuak PSG
![](https://theaizawlpost.org/wp-content/uploads/tap_logo-min-large.jpg)