KPop Demon Hunters soundtrack HUNTRIX “Golden” chu Billboard Hot 100 (US singles) chart-ah a No.1, he chart-a kar nga a No.1-na a ni ta a, Billboard Hot 100 history-ah animated movie soundtrack zinga he chart-a No.1 ni rei thei ber a la ni. Kar kalta khan a hmaa he record siamtu, kar li No.1 ni thei The Archies ‘Sugar, Sugar’ (1969) leh Chipmunks leh David Seville ‘The Chipmunk Song’ (1958) te a nih rual a, tunah chuan heng hla pahnihte hi kalsanin, record a siam ta a ni. HUNTRIX tana aw thawhtu EJAE, Audrey Nuna leh REI AMI te pawhin a hmain record siamin, K-pop nena inkungkaihna nei, hmeichhe hlang group zinga he chart-a No.1 ni thei hmasa ber an lo ni tawh a, hei bakah hian KPop Demon Hunters soundtrack atanga hla pali chu he chart top 10-ah hian tum khatah langin, tum khata film pakhat soundtrack top 10-a lang hnem thei ber record a lo siam tawh bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni a, “Golden” hian kar khat chhungin stream maktaduai 33.8, radio airplay ngaithlatu maktaduai 26.3 leh sales 8,000 nei lehin, a kar nga nan he chart-ah hian a No.1 leh ta a ni.
He chart-a kar 10 No.1 ni thei Alex Warren ‘Ordinary’ chu No.2-ah bawk awm lehin, chart No.1 hlui bawk Sabrina Carpenter ‘Manchild’ chu No.4 atangin No.3 a kai thar leh a, KPop Demon Hunters soundtrack dang Saja Boys ‘Your Idol’ chu No.4 a ni a, Saja Boys hla dang ‘Soda Pop’ chu No.5 a ni bawk.
Sabrina Carpenter hla dang ‘Tears’ chu 3 atangin No.6-ah a tawlh a, chart No.1 hlui Morgan Wallen ‘What I Want’ featuring Tate McRae chu No.7-ah bawk a la awm a, HUNTRIX ‘How It’s Done’ chu No.8 niin, Ravyn Lenae “Love Me Not’ chu No.8 atangin No.9-ah a tawlh a, Justin Bieber ‘Daisies’ chu No.11 atangin No.10 a kai thar ve leh thung.
Record siamin Hot 100-ah HUNTRIX “Golden” a No.1
