Record siamin Mariah Carey ‘All I Want for Christmas Is You’ a No.1

Record siamin Mariah Carey ‘All I Want for Christmas Is You’ a No.1
Mariah Carey Krismas lengzem hla chuai thei , kum 31 kalta a tihchuah tawh “All I Want for Christmas Is You” chu Billboard Hot 100 (US singles) chart-ah a No.1 a, he chart-ah hian a zawn lovin kar 20 a No.1 tling ta a, he chart an tihchhuah tawh, kum 67 chhunga No.1 ni rei thei ber a ni ta.
Mariah Carey ‘All I Want for Christmas Is You’ hi 1994-a tlangzar kha niin, December 2017-ah a vawi khat nan Hot 100 chart top 10-ah a lang ve chauh a, 2018-ah top 5 kaiin, 2019-ah kar hnih a No.1 a, 2020-ah kar hnih bawk No.1 lehin, 2021-ah kar thum, 2022-ah kar li, 2023-ah kar hnih leh 2024-ah kar li a No.1 tawh bawk.
2024-a a kar li a No.1 khan Shaboozey hla hit ‘A Bar Song (Tipsy)’ leh Lil Nas X ‘Old Town Road’ featuring Billy Ray Cyrus te record, kar 19 a rawn nih rual a, tunah chuan heng hla pahnih te hi kalsanin, record thar a siam ta a ni.
Mariah Carey hian No.1 ni rei ber record hi tum hnih a siamna a ni ta a, 1995-96 khan Boyz II Men nena an hla ‘One Sweet Day’ chu kar 16 No.1 niin, chart record an siam a, kum 23 chhung an record hi a din hnuah 2017 khan Luis Fonsi leh Daddy Yankee ‘Despacito’ featuring Justin Bieber-in an rawn khum a, ‘Despacito’ record hi ‘Old Town Road’-in a khum ve leh a ni.
Mariah Carey “All I Want for Christmas Is You” hi Hot 100 chart-ah kar 77 a lang tling ta chiah bawk a, hmeichhe zaithiam hla sak zinga he chart-a lang rei ber record siamtu Dua Lipa ‘Levitating’ a nih rual ta chiah bawk.
Mariah Carey hian Hot 100 chart-a No.1 ni thei hla 19 a nei tling tawh a, soloist zingah chuan he chart-a No.1 kai thei hla ngah ber niin, No.1 kai thei hla 20 nei thei Beatles chiah a pha lo a, Carey hian 1990s. 2000s, ‘10s leh ‘20s-ah te chart No.1 a la nei vek a, hetiang tithei hmasa ber record a lo siam tawh bawk. He chart-a a No.1 hmasak ber atanga tuna a No.1 inkar hi kum ruk a tling a, No.1 nih hmasak ber atanga No.1 nih leh hun inkar rei ber a la ni bawk.
He chart-a Mariah Carey hla hrang hrang No.1 ni tawhte No.1 nih hun chhung belhkhawm chu kar 99 a tling tawh a, he chart-a No.1 ni rei ber a nihna a sawhnghet leh ta sawt a ni. Chart-a No.1 nih reiah Carey hi a sang fal hle a, a hnaih bertu Rihanna niin, kar 60 a No.1 tling tawh a, The Beatles (59), Drake (56) leh Boyz II Men (50) ten an dawt.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘All I Want for Christmas Is You’ hian kar khat chhungin stream maktaduai 39.5 leh radio airplay ngaithlatu maktaduai 22.6 bakah sales 3,000 a nei a, a kar 20 nan chart-ah a No.1 ta a ni.
Krismas hla pawhin rimawi khawvel a al hneh leh ta hle a, Hot 100 chart top 10 a hla pariat ngawt chu Krismas hla a ni tawh. Brenda Lee “Rockin’ Around the Christmas Tree” chu No.3 atangin No.2-ah a insawn a Wham! “Last Christmas” chu No.2 atangin No.3-ah a tawlh a, Bobby Helms “Jingle Bell Rock” chu No.4-ah bawk la awmin, Ariana Grande “Santa Tell Me” chu No.8 atangin No.5 a kai leh ta bawk.
Nat King Cole “The Christmas Song (Merry Christmas to You)” chu No.9 atangin No.8-ah a insawn a, Kelly Clarkson “Underneath the Tree” chu No.11 atangin No.9 a kai a, Andy Williams “It’s the Most Wonderful Time of the Year” chu No.5 atangin No.10-ah a tawlh ve thung.
Hot 100 chart top 10-a Krismas lam hawi hla ni lo awm chhun pahnih chu chart No.1 hlui KPop Demon Hunters soundtrack HUNTRIX “Golden” leh Taylor Swift “The Fate of Ophelia” te niin, “Golden” hi No.5 atangin No.6-ah a tawlh a, “Ophelia” hi No.6 atangin No.7-ah a tawlh ve thung.