Daily Newspaper

Red and Gold thuam inbel tur Mizo Sniper

15

Indian top flight thar Indian Super League (ISL) khel tura inziaklut thar East Bengal chuan khup hliam avanga hun rei tak talbuai tawh Jeje Lalpekhlua senglut turin inremna an siampui.

Indian top flight thar Indian Super League (ISL) khel tura inziaklut hlimhlawt East Bengal leh Jeje Lalpekhlua chuan inremna an peihfel a, season tharah Mizo sniper hian Red and Gold jersey a ha dawn.

East Bengal thuchhuah chuan Mizo striker nena inremna an peihfel chungchang hi social media lamah puangin ‘Big signing!’ an ti a, season thara an player chhawr turte hming tarchhuah thuai an tum thu an ziaklang tel.

Kumin nipui lai khan Chennaiyin FC-a Jeje contract neih lai chu tawpin South Indian team-ah contract thar a ziak lo a, free agent niin Kolkata giants nen inremna an sawifel ta a ni.

Tarlan tawh thin angin, India striker hi khup hliam avangin season liamtaah khan khelmual a lut hlei thei lo a, tunah hian a hliam a dam tan a, comeback tura a inbuatsaih laiin a team vawn tur pawh a thlang fel a, a club hlui Mohun Bagan hmelma lianber East Bengal tan ISL kawtkaiah Kolkata derby a khel leh dawn a ni.

Kum 29 mi Hnahthial tlangval hian kum 2015 leh 2018 khan Chennaiyin FC chu Indian Super League title vawihnih l^kpuiin, Bagan thuam inbel chungin Federation Cup (2016) leh I-League (2015) trophy a lo chawi tawh bawk.

Jeje hi India head coach Igor Stimac chuan King’s Cup leh Intercontinental Cup (2019) khel tur squad-ah a ko lo a, India shirt a h^k hnuhnunber chu January 2019 AFC Asian Cup kha niin, 2017 Arjuna Award nominee zingah langin an thlang lo a, kumina Arjuna Award dawng thei tur zingah a hming dahchhuak leh mah se Mizo striker aia club leh ram tana thawhhlawk lo zawk Sandesh Jhingan thlan niin, national award dawng tura chhawp-chhuah a ni chunga hnawl a ni leh thin hi an tunhnaiah vuipuitu pawh a nei chho ta tak tak a ni.

Chennai club a zawm tirh phat atang khan Jeje hi Chennaiyin poster boy a ni chho nghal a, he team history-a goal thun hnember niin, India senior team tan pawh khelh 56 atangin goal 23 a thun tling tawh a; India U-23 team tan game 13-ah goal ruk a tilut bawk.

Mohun Bagan leh Chennaiyin FC bakah Pune FC, Pailan Arrows leh Dempo tan a lo khel tawh a, foreign lamah trial hmachhawn tawhin, Indian player zinga tawnhriat ngah ber pawl a tling pha.

ISL khel tura Jeje Lalpekhlua club thar ber East Bengal an inziahluh hmain Kolkata club dang Mohun Bagan chuan season thar atanga Indian top flight ni tawh tur ISL khel tur hian tihfel ngai an lo tifel tawh a, Bengal hian theihtawp chhuah zui vein, West Bengal chief minister Mamata Baner-jee tanpuina pawh an dawng hial a ni.

An sponsor pui ber nen an inthen hnuah sum lama thawhpui tur dang an dap a, Shree Cement Limited nen inremna an siam hnuah Ningani khan West Bengal football thuneitu Indian Football Association (IFA) lama an hming ziah dan pawh Shree Cement East Bengal Foundation tiin an thlak fel ta.

IFA general secretary Joydeep Mukherjee chuan Bengal hmingthar neih thu hi nemnghetin, IFA pawhin Shree Cement East Bengal Foundation tiin a ziaklut fel tawh tih a sawi.

Tunkar tir lam khan Football Sports Development Limited (FSDL) chuan official-in Indian Super League (ISL) lama Kolkata giants lakluh an nih thu hi an puang a, Indian top flight thara Kolkata derby thlir tur a awm leh tur hi Red and Golds faithful tan chuan duhthusam a ni ngei ang.

Company thar (Shree Cement East Bengal Foundation) hi Shree Cement Limited leh East Bengal intawm a nih tak avangin East Bengal hian an share lian (76 per cent) leh an sporting rights chu Shree Cement East Bengal Foundation-ah hian an chhunglut fel tawh a, an thil neih hlui leh bungruate pawh company tharah hian an hlanglut chho zel dawn a ni.

Kum 2014 khan a vawikhatna atan team pariatin ISL an khel tan a, East Bengal hi ISL khel tur team sawmpakhatna an ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy