Daily Newspaper

Reds leh Red Devils mangchhia

31

Pathianni zana English Premier League khelhah team lian pahnih Liverpool leh Manchester United te an mualpho va, an khingpui lakah chiang taka tlawm ve ve in an tan zan chhe takah mangchhia an mang. Liverpool hi Aston Villa lakah 7-2 ngawtin an tlawm a. An mikhual Tottenham lakah United chu 6-1 tehrengin an tlawm ve bawk. Mangchhia an mang zanah hian Reds leh Reds Devils tantute uang thei leh inhmuhsit thei an awm lova, chu chu an tan thil tha awmchhun niin a ngaih theih.

United an pawr zuih!
Brighton & Hove Albion lakah vanneihthlak taka chak a, hun tawp hnua penalty hmanga point thum an hmuh hram hnu a EPL an hmachhawn hmasak berah United chuan Old Trafford-ah an manager hlui Jose Mourinho-a enkawl Tottenham an mikhual. An mikhual lakah tha chungchuang taka bul tan in, goal thun hma hle mahse an pawr zuih a, 6-1 ngawtin tlawm zawkah an tang a. United hian season thar bul an tan chhe hle a, khelh thum atangin vawihnih ngawt an tlawm tawh a, 16-naah an awm mek.

Old Trafford-a inkhel ngaihven hlawhah hian bul an tan chiah a, United in an nawr nghal chat a, an nawr tlang nghal pawp. Anthony Martial chuan penalty a hlawhchhuak nghal a, he penalty hi Bruno Fernandes chuan inringtawk zetin a pet goal nghal a, hma an hruai nghal der.

Hma takah goal chhuah nghal mai mahse mikhual team Spurs an zam ikhaw lo. |ha zetin an nawr let a, an si phurh an sut nghal thuai. Minute lina lekah United tlarhnung an talbuai a, defender manto Harry Maguire talbuai vangin Tanguy Ndombele chuan hnai setsawt atangin a pet goal. An si phurh an sut hnuin thothang tha takin an inlan zui a, an khingpuite an nawr na hle. Harry Kane chuan free kick a hlawhchhuah chu rang zetin a pet a, United inthlahdah lai takin Son Hueng-min chuan a khalh tlang a, class angreng taka peet goal in minute 7-naah hma an hruai letna goal a thun zui leh nghal zat.

An mualah ngei hnufual zawka an tan hnuin minute 28-naah Anthony Martial chu Erik Lamela a ben vangin hnawhchhuah a ni zui leh a, tlem zawk an nih hnuin United an talbuai thui leh zual. Mourinho-a team te hian goal thun belh ngei tumin an nawr vak a, United tlarhnung talbuai hremin minute 30-naah Harry Kane chuan an goal thumna chiang zetin a thun. Tottenham player te hi an phur hle tawh a, an tlar fua fua vek tawh. Minute 37-naah Maguire chesual nawn lehin a kap karah ball a chhuah a, Son chuan mawi zeta pet goal in chawlhlawk a nih meuh chuan Tottenham hian 4-1 ngawtin hma an hruai der tawh.

Chawlhlawk hnu lamah pawh Spurs an khel tha zui zel. Chiang zeta United tlarhnung an thiah hnuin minute 51-naah defender Serge Aurier chuan an goal ngana a thun belh leh nghal zat. Hun tawp dawn hnaih minute 79-naah Paul Pogba chuan penalty a chawi zui leh a, Harry Kane chuan an goal ruk nan pet goal in, Old Trafford-ah 6-1 zeta chakin, hun hlimawm leh chhinchhiahtlak tak an tawngbaw zui ta a ni.

6-1 ngawta Tottenham an hneh loh tum hian United Captain Harry Maguire a che sual nasa hle a, dem a hlawh viau. A tihsual vangin goal li thum ngawt an chhuah a, Martial hnawhchhuah a nih lai hla tak atanga a lo en ngawt pawh kha United captain dangte tih ngai loh a ni a, Unites captain meuh atan chuan iai a hlawh sawt hle a ni.

Reds an zawr
United an mualpho hnu lawkah Liverpool chuan Aston Villa an hmachhawn zui ve leh a, an hmelma mualpho nuihzat thei bik lova awm in, 7-2 ngawtin an mualpho zui ve leh zat.

Villa Park-ah Villa in an khel tha tak zet a, Reds tlarhnung an thiar darh hneh thei hle. Minute 4-na lekah Ollie Watkins chuan hma an hruaina goal a thun nghal mai a, minute 22 leh 39-naahte goal thun belhin chawlhlawk hmain hattrick a siam hman der. Reds tan Salah chuan minute 33-naah goal thun bawk mahse minute 39-naah McGinn chuan Villa tan goal a thun belh leh bawk a, 4-1 a hmahruai chungin chawlhkawk an hmang.

Chawlhlawk hnulamah pawh Villa an khel tha zui leh, minute 55-naah an player thar Barkley chuan goal a thun a, captain Jack Grealish chuan goal hnih a thun zui leh sak bawk. Reds tan Salah chuan goal thun ve leh bawk mahse 7-2 ngawta tlawmin an mualpho zui hle ta tho a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy