Reese Witherspoon leh Jim Toth inthen
Hollywood star Reese Witherspoon leh a pasal, a talent agent ni thin Jim Toth te chu kum 11 an inneih hnu inthen zai an rel ve leh ta. An nupa awm hran thu hi March ni 24 khan an puang a, Instagram-ah tuchhuah siamin, “Mimal thil puan tur kan nei a… Uluk taka kan ngaihtuah hnuah thutlukna kirh zet mai siamin inthen zai kan rel e. Kum tam tak hlim takin kan khawsa ho tawh a, hmangaihna, dawhtheihna leh inzah tawnna thuk tak nen hmalam kan pan a ni,” an ti.
Boruak chhia an nei lo va, a chhan sawi tur pawh a awm chuang lo niin an chanchin hrechiang tuten an sawi a, an pahniha thutlukna siamin, inpawh tak chungin inthen zai hi an rel ta niin a lang a, an fate pawh an enkawl dun chunzawm zel dawn tho a ni. Witherspoon, kum 47, leh Toth, kum 52, te hian fapa Tennessee James Toth, kum 10 an nei tawh a ni.
An pahnih hian 2010 khan an thiante ina inhmuhkhawmna atanga intawng an ni a, an intawn tirh atanga inngaina leh induh zui ta an ni nih 2012-a ELLE-in an kawmnaah Witherspoon hian a lo sawi tawh nghe nghe a ni.
Witherspoon hian pasal hmasa Ryan Phillippe neiin, 1999-a ‘Cruel Intention’ film an chan dunna atanga inhmel duh zui ta an ni a, 2008-ah an inthen a, fanu Ava Pillippe, kum 23, leh fapa Deacon Phillippe, kum 19 an nei hman.
Reese Witherspoon leh Jim Toth inthen
![](https://theaizawlpost.org/wp-content/uploads/2023/03/ree.jpg)