Rel beih hnuah NATO-in tam zawka Ukraine puih tum
NATO Secretary-General Mark Rutte-a chuan Russian drone-in Poland ramri bul a fuh hnu lawkah Ukraine puihna tam zawk pek a tiam.
Rutte-a hian an member ram 32-te zingah Russia-Ukraine indona kal mekah Kyiv puih hnial an awm lo tih a sawi a. Russia nena khawchhak lama NATO inrina bawr vawnhimna tihchak a ni dawn bawk tih a sawi.
NATO chief-in hetiang a sawi hi Poland-in Ukraine nena an inrina hrula venhimna tihchak a tum thu a sawi hnu lawkah a ni a. Pathianni khan Russian drone-in Ukraine-Poland inrina bulah rel fuhin a pahnihna phei chuan ramri kânna bul chiah a fuh.
Drone hian British prime minister hlui, Boris Johnson-a leh Swedish prime minister hlui, Carl Bildt-a leh ram dang palaiten station an tlan pelh hnu lawkah a fuh niin Ukraine-a sorkar rail operator chuan a sawi.
“Nimin (Pathianni)-a NATO bul lawk, Ukraine ramria rel beihna hian Putin-a manganna leh hlauhawm leh rawng anga a inlan duhna a tilang a ni,” tiin Rutte-a hian Brussels-a NATO political headquarters-ah a sawi a. “Russia hi Ukraine nena an indonaa a nunrawng tawlh tawlh angin mumal lo takin a che nasa tawlh tawlh a ni,” a ti.
Polish Defence Minister Wladyslaw Kosiniak-Kamysz-a chuan Thawhtanni vek khan an sipaiten tuipui kam khua, Jaroslawiec-ah a bul lawk, Baltic Sea atanga thlawhtir ni ngeia rin Russian sipai drone an hmu tih a sawi bawk.
European Union palai lawk ber, Kaja Kallas chuan Polish ramri bul beihna chu ‘khawthlang ramten Ukraine an puihna hlauh nana tih a ni tih a chiang’ a tiin a. “Kan hlau lo va, Ukraine tan kan awm reng a ni tih kan tilang ang,” a ti.
Rel beihna chungchang zawhna chu Kremlin thupuangtu, Dmitry Peskov-a chuan Russian sipaite chu ‘Ukraine ram pumah an che a… an chet chhunzawm zel bawk ang’ tiin a sawi.
Polish Prime Minister Donald Tusk-a chuan Pathianni khan Moscow chu Ukraine khawthlang lam ramrite beih a tum niin a lang tih a sawi.
Polish thuneitute chuan CIA leh hnu chhuitu pawl dangten kar hmasa khan Ukraine an puih thin tihhlauhna turin Russia-in ramri leh European ram chin a bei thei tih an lo sawi tawh bawk.
Hetih lai hian US President Donald Trump-a chuan Ukraine leh Russia hian energy hmunhmate inbeihsak lo turin an inrem tih a sawi.
US president hian tun hnaia inremna a awm theih nan a bei thar leh a. November thlaa an rama midterm election awm turah a boruak a hniam a, siam that tuma a beihna pakhata ngaih a ni.
“Ukraine hian Russian energy beih loh a remti a. Russia pawhin hetiang bawk hi apawm,” tiin social media-ah a tar lang.
Ram pahnihte hian hemi chungchang hi engmah an la sawi lang ve lo thung.
Rel beih hnuah NATO-in tam zawka Ukraine puih tum
