Chief minister Lalduhoma chuan a office-ah NF Railway (Construction) general manager AK Chaudhary leh a thawhpuite a kawm a, Sairang rel station hawn hun tur leh Mizoram chhimlama rel kawng kal zel tur a sawipui.
Sairang rel station hawng turin chief minister hian Prime minister Narendra Modi a sawm a. Prime minister hi a rawn kal theih dawn chuan inbuatsaih a ngai a. A hawnna function neihna hmun tur, Hortoki leh Mualkhang station-a tlawhna atana helicopter tumna tur lo siam lawk, rel kawng a endikna atana special coach buatsaih a tul tur thu an sawi. A ranglama inbuatsaih turin general manager hi chahin, an hmalakna August 19-ah enho leh nise, an ti.
Union Railways minister-in a lo tiam tawh anga, Sairang rel station chu world class-a siam zui dan tur leh Rajdhani Express a rang lama tlantir nghal dan tur pawh an sawidun a ni.
NF Railway hotu hian rel kawng leh station chu hawn theiha peih a nih tawh rualin, Sairangah Secondary Maintenance Facility Centre for Coaches an sa leh mek a. Hei hian thla khat leh a chanve vel a awh dawn avangin an sak zawh hun hi central lam chuan an rawn ngaichang leh maithei, tiin an hmalakna kal mekte chief minister hi a hrilh.
Chief minister hian Thenzawl chu Peace City atana siam tum a nih thu leh master plan siam hna an tan mai tawh tur thu sawiin, chhimlama rel kawng kal zel tur hian Thenzawl Peace City hi a daifem, hla vak loah paltlang thei se, station hi hla lutuk lo se a duh tih a hrilh. Preliminary survey-ah chu chu lo ngaipawimawh turin a chah. Thenzawl kianga kaltir an tum dan report chu kumin October vela hriattir hman a tum tur thu chief minister hi a hrilh bawk.
Rel station hawn ni tur la chiang lo
