Daily Newspaper

REMNA SIGNED LEH MNF ARMY KHAWSAK DAN

17

Remna spl. report:- Mizoram Remna leh Muanna India leh MNF/MNA te inremna- kawngzawh chhung kha kum 10- zet a nih avangin, Arakan-a MNF Provisional Gov’t-a awmte khan, Remna leh Muanna chu beisei zel dan pawh an hre seng tawh lo va. Inbiakna kha lo hlamzuih ta pawh ni se, tal buai lo turin kawng hrang hrangah hma an la nasa hle a. Mahni intunnunna atan, Leilet zau tak te siamin Bawngchal te nen an leilet te an enkawl ngawrh hle a. Sipai Section khat; fel theh thawh, Officer- hovin an riahchilh reng thin a ni. Khatih lai pawh khan Sipai training chi hrang hrang pawh neih a ni reng a; Khatia inremna lam kawng kha ping leh failed- anga a awmna chhan kha inbiakna kha a hlawhchham zing lulai em a ni. Kha vang khan MNF/MNA te khan beisei dan pawh an thiam seng bik tawh lo a ni. Inbuatsaihna hrang hrangin hma la mah se, Ningani (Thursday) apiangin tawngtai inkhawmna neih a ni thin a. Hemi ni hi chu hun dang aiin ngaihpawimawh a hlawh bik a ni. Chuta tawngtai thupui ber chu; “Lalpa Zorama Remna kan nghah hi, MNF-duh dan emaw, India duh dan emaw ni lovin Nangma duh dan leh remtihna ni rawh se” tih a ni. Hei hi a hmuh dan tak tak pawh a ni a, 1984 kum phei kha chu hreawm an ti hle a, remna awm mai tur anga ngaiin an inthlahdul deuh va, chutih laiin remna kha a awm ta mai si lova, ei leh barah an buai phah hle a ni. Rilrua beisei phakloh hnuah Remna rim a rawn nam ta a; A.I.R Stationin “Ka hla duhzawng” Programme-ah (Arakan-ah zan dar 10 p.m vel a ni) June 29.0986-ah ti hian, “Zanin zanlaiah India leh MNF ten inremna an ziak fel dawn a, TVah en theih a ni ang” tih a puang a; Hnam Sipai ‘L’ Bn. (Lalvunga Battalion) ten an lo ngaithla fuh hlauh mai a. Hei hi an khua a har deuh thin avangin A.I.R Aizawl hi fiah manglo chung pawhin an ngaithla hram hram thin a ni. Khami zan ber kher kha chu Battalion- dang Radio Set/herh an lo awm loh zan a lo ni a, ‘L’ Bn. te chu mutmu pawh tuah lovin “Remna” an sign-tur chu an lo nghak thuap mai lo niin, puan lawk angin 30th June 1986 zanlaiah chuan ‘Remna’ chu signed fel a lo ni ta a. ‘L’ Bn. ho chu an sahawk hle a, Silai te kapin rithei zawng zawng te pawh an lo vaw ri nasa mai lo niin, chutih lai chuan Capital-lam chuan engmah an lo hre ve hauh lo va. Hnam sipai Roll Call-ah pawh hnathawk tur leh, an thawh dan tur an ruahman fel vek hlawm a. ‘L’ Bn. hotu Lt. Col. Pu Malsawma chuan zing takah sipai tirchhuakin Capital-lam chu chanchin a hrilh ve ta a, tichuan Capitallam chuan an hre ve ta chauh a ni. Chutia Remna Signed a ni tih an hriat veleh, Vice President Pu Zoramthanga chenna inah an tlan khawm a, an inchibai nak nak a. An lo tih dan thin angin tlachawp ro an rel ta a. 30th June 1986-hi “Remna Ni” a nih angin Hnam Sipai hmun tinah Sorkar (Underground Sorkar = Provisional Gov’t of Mizoram) chuan Holiday-a puang ta a. Mahni hmun theuhvah “Pathian hnenah lawmthu sawi ni rawh se” tiin Order siam nghal a ni. Capital-ah chuan, hall-ah tawngtai inkhawm urhsun taka neih a nih hnuin infiamna chi hrang hrang neiin nilengin intihhlimna neih a ni a, Cabinet Team leh Army Chief Team ten Football ah khel a. An inchona a rei tawh bawk a. Cabinet Team chu Pu Zoramthangan a hova, Army Team chu Pu Tawnluian a ho ve thung a. An han inkhel zet mai chuh Army Chieflam chuan “Pre-Plan” an lo nei ru a ni awm e. Hun chanve hnu lawkah, Col. Nohrang-ball han khalh chu Pu Rinchhana Minister-in a chuha chu velah Pu Nohranga chu a tlu ta a, a biak theih ta tlat lo mai a, Medical-lamin zawnchhuak in an bawihsawm ta a. An lo ruahman ang ngeiin Pu Nohranga chuan, nuichungin “Tikha chuan kan chak tawh ngei ang” a tihkhum ta mai a, Cabinet-lam chu an hrilhai hle a ni awm e. Remna ni chu Capital-ah chuan hmang ve mah se, a awmzia erawh hriat chianna tak chu an nei lem lo. Chawlhkar khat hnuah Remna Palai zing ami Pu Rualchhina chuan Capital a Z.D Lalvunga Khatla East ‘F’ Line Sorkar Laipui Minister Pu Shekhawat-a’n Pu Zorama a Hau!! thleng a, chuta tang chuan thil awmzia an hre ve ta chauh a ni. Tichuan Hnam Sipai Battalion-tin C.O te chu Capital-ah kohkhawm an ni a, rem an ruat ta a tahchuan “Remna kan nei ta a, kan chhuah a t-[ul ta si a hna kan thawhpui tur te chu, min hektute, min mana min sawisatute an ni dawn a, keini (MNF/MNA) tute mahin phuba lakna rilru kan pu tur a ni lo, ‘Remna’ a nih ang ngeiin mite va remtu kan ni tur a ni” tih chu nasa takin an inzirtir a. “Chutihrual chuan kan tangrual thei em? silai chheprelh mai kan awm ang em? tih thlengin an ngaihtuah a ni. Tichuan Army Chief Order angin, Battalion tina silai chu hmantlak vak loh thlengin an siam tha a. Awm dan mawi leh tul ang ang an inzirtir vek bawk a. Tichuan, 21st July 86 (Monday) ah an ruahman lawk angin Pu Rualchhina hovin, nunau chak lo zual mi tam tak chuan Capital an chhuahsan ta a. Pharvaah innghahkhawm tur tih a ni a. Kal hmasa ho hi an chhangchhe hle a, kalkawnga Thingluang kan tur pawh a chung leh a hnuai chu a bel zawng a inang reng a ni awm e. A hmasa ho an kal liam atang chuan an chhehvela Zohnahthlakte chu an lo lang tan ta a. MNF/MNA ten an thil neih tam tak, Mizorama ken theih loh tur te chu an tiral nual a, Japan siam Buhdeng khawl leh thil thenkhat pawh Sialin an thleng vek a ni. Hetia rana an thleng avang hian, Pharva thlengin sa eitur an neih phah a ni. Hetiang khawchhung mite nena an indawr meuh chuan, an buhfai neih te eizawh a lo tul ta a. In khatah mikhual 20/30 vel nei ang an ni deuh reng a. Tichuan Army Hqrs. lam pawhin an tih tur te an ti zo va. Silai chi hrang hrang list leh, a tak tak a inmil em? tih an chheprelh an awm lo tih a chianga Remna atana Hnam sipaite an lungrualzia a lang chiang hel a ni. July- 23rd’ 89 (Wednesday) khan Vice President Pu Zoramthanga hovin Arakan chhuahsan runpui chu a thleng ta a. Zing dar 10:00 (Bangladesh standard Time) ah Capital Field ah an chhuak khawm vek a. Pu Zoramthanga’n thusawina a nei a, Capital chhehvela Civil-mite chuan, MNF/MNA Mizorama hawng tur chu mittui nen an thlah a, an lung a chhe tlang a ni ber e. Pu Lalrinchhana chuan tawngtaina neiin chu mi hnu chuan Hnam Sipaite chuan an piannna Zoram lam pan turin leh ruahman angin an kal ta a ni. An awmna khaw mipuite chuan anmahni tawngin; “Dam takin kal rawh u, min rawn theihnghilh reng reng suh u, Pathianin min hruaikhawm leh rawh se” tiin mittui ne an inthlah liam ta a ni. Arakan chhuahsan hun hi fur chhe lai tak ni mahse kal harsa khawp erawh a ni lo va, MNF/MNA te tan Pharva thlengin Dt. 27th July’86 chuan India aiawh leh MNF – aiawhte chuan silai leh a mu chi hrang hrang te, Grenade etc. thlengin, Remna Thuthlungin a sawi angin MNA te chuan an hlan ta vek a ni. Hnam sipai ten thlasik vawh lai ber pawha nupui anga an lo mutpui silai an han pe lut ta mai chu, anni chauh ni lo hotu lian te ngei pawhin hmuh hreawm an ti a ni. Hnam sipai ten mittui hru zauh zauh chunga silaimu an chhiar lai han hmuh meuh chuan Barrak chhunga awm rei a har reng a ni. Zofa ten remna kan mamawh tawh si avangin, Remna thuthlung angin, MNF/MNA te chuan engkim dik thlapin an ti a ni tih khawvel hriatah an pholang ta a nih kha!!!! “The woods are lovely, dark and deep, But I have promises to keep And miles to go before I sleep”

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy