India ram danpui hman tanna ni, Republic Day chu India ram hmundang rualin Nilaini khan Mizoram hmun hrang hrangah lawm a ni a. Covid hrileng a kian hnu kum hnih hnu ah kumin hi kumdanga hman thin angin pangngai taka hman lehna hmasa ber a ni. Aizawlah chuan Sipai Lammualah larsap Hari Babu Kambhampati hoa hman niin, hnam puanzar a pawhparh hnu ah parade contingent 26 ten hnam puanzar zahna chibai an buk a chhanglet a. Republic Day pual thuchah a sawi zui a ni.
Larsap chuan Zoram mipuite duhsakna chibai bukin, kum 1950 January 26-ah khawvela mipui sawrkar ram lian ber zinga chhiar tel turin India danpui kan nei a, he danpui hian ram khua leh tui zawng zawngte tan dikna, zalenna, intluktlanna min pek bakah ei leh bar intodelhna leh mipa leh hmeichhe intluktlanna thlengin kawng min hawnsak, tiin a sawi.
Tlawmngai pawl hrang hrang, kohhran leh mipui zarah sawrkarin hmalakna lian tak tak hmangin state hmasawnna tur chak takin a thawk zel tih a sawi a. Socio Economic Development Policy kaltlangin Mizoram sawrkar hmalakna pawimawh tak tak kalpui a nih thu a sawi bawk.
“Ram hmasawnna leh ram siam hna hi englai pawha kal reng a ni a. Min thlahtu kan pi leh pute thawhrah tel mektute hian kan tu leh fate hmakhua atan vawiinah hian inhlan ila. Kan ram danpuiin a tum bulthum hrereng a, chumi dungzuia kan kal zel avangin hmasawnna chhinchhiahtlak kan nei zel a, kan ram hian chak takin hmasawnna lamtluang a zawh zel ang tih hi ka ring a ni,” a ti.
Republic Day vawi 74-na denchhena Aizawla hun hmanah hian state leh national award bakah lawmman dawngtute hnenah sem nghal a ni.