Ruatfella Nu
Thiamna, finna leh tlinna pakhat mah nei lo mah ila kohna avangin kei mimawl tak hian kum 25 zet ka mihring puite chunga hleilenna leh mihring dikna chanvo rahbehna ka do ve a. Keimah lamah kohna hlen thawkhata inhriatna neiin, “Ka chawl ve tawh ang a, thilsiam tinreng tana chhiatna thlentu hman khat daih sarang (single use plastic) thlakna industry ka din hi ka ti lian deuh deuh ang” ka tih laiin, 2017-ah Environmental Justice leh kan ram Ecology tan mihring dikna chanvo humhalh tura kohna ka dawn aia kohna sang zawka koh ka ni leh a. Thilsiam dang tana kohna hi a sang bawk a, ka inpekna pawh a thuk a. Ka rilru leh thlarau, ka chakna leh theihna zawng zawngin ka bei a ni. Heti taka ka inpekna san chhan chu – environment kan zahpah loh lutuk hi siamtu Pathian zah lohna leh A duh dan lo lutuka kan kal sual mekna hi ka hmu a. Hnam anga min ti mualphotu nia ka hriat vang a ni.
He ka kawng zawh mekah hi mi dang influence leh duh dana kal ka ni ve lem lo a. Tin, tute emaw kuangbang nghak a, a whisky leh a tangka lama a thlem thluka vei nei ve ta riaua ziak tial ve fo lah ka ni hek lo. Kan ramngaw leh nungchate dinhmun ka ngaihtuah hian, ka thinlung a nat thin avangin, ka thiam tawk leh phak tawk bakah mithiam te be rawnin hma ka la ve a ni ber.
Mihring dikna chanvo humhalh aiin environment humhima humhalh hi a harsa fe ang tih chu ka hre sa a, a taka ka’n beih meuh chuan a har fe a ni satliah lo a, a khirhin a lo hautak zawk hle a nih hi. A chhan chu mihring duham chinlem nei lote hmachhawn an ngai miau a ni. Hautakin khirh hle mah se kan ram leh hnam hma lam hun atan thil dik leh tha a nih avangin ka kal zel a ngai a, thangthar chhuan lo la awm zel turte tan engkim tuar huamin ka bei zel dawn a ni.
Eng nge Reserved Forest chu: Mizoram Forest Act, 1955 chuan Reserved Forest chu he dan hmanga ramhnuai enkawl tur a tihte an ni a. He dan tih hi Mizoram Forest Act, 1955, Assam Forest Regulation, 1891 ang zul zuia siam a ni a. Mizoram Forest Act, 1955-ah tho hian Reserved Forests puan a nih theihna tur section 14-21 te ah chiang tak a ziah lan a ni bawk. He dan zulzui hian Reserved Forests pawh hmun hrang hrangah puan a ni ta a ni.
Reserved Forest chu a hnawk ta viau em ni?: Thil reng reng hi a neitu leh a hmangtuin an hman thiam loh chuan a hnawk vek thin. Hnam dang thu sawi fo pakhat chu: “Zawng chemte pek” an ti a, chu chuan a entir chu Zawng chu chem i pek chuan thil tha tih nan a hmang dawn lo a, pawi khawih nan a hmang dawn tihna ang a ni. Ka thlir ve dan chuan Reserved Forest hi-
Thingtlang leh ramhmul behchhana eizawng tute hrektu pakhat a ni. An tan chuan thil hnawk tak a ni.
A enkawltu dept tan pawh an enkawl sen loh ram, phur rit petu a ni a, an lu ti haitu a ni. A changin power kenkawh tur petu a ni mah sela, huat leh beihrawn an hlawh phahna a ni a. Kut pawh an tuar phah fo thei?
Revenue dept tan revenue an hmuhna tur daltu a ni. Mahse kan ramah hian RF chhungah periodic patta leh LSC thleng pawhin 1965 (RF puan hnu) leh 1980 (Forest Conservation Act, 1980) hnu lamah pawh pek an ni fo thin a. Revenue hi Zawng chem pek ang an ni mai thei e.
Huan zau deuh hlek neih duh tu, khawpui leh thingtlanga awm thei deuhte tan daltu a ni thei.
Compensation hui tum a, Forest Conservation Act kal kan tumtu, official leh non-official tan daltu hnawk tak a ni.
Hmasawnna duhtu, Project Implementing Department te tan leh contractor-te daltu a ni fo.
Kan ramin hma sawn ve se ti a, thahnemngai deuha thawktu, works department-te tan hian a hnawk ngawih ngawih tih a chiang a.
Tin, a enkawltu fak hlawh ve lo ho, “ti suh” ti tura an rawih ho tan hian mi thenkhatin power a pe/nei emaw an tih lai hian a ninawm thei hle ang.
Heng thlirna hrang atanga ka han thlir hian tunlaia kan buaina ber leh Reserved Forests haw bertu nia ka hmuhte chu Uchuak taka Compensation sum beiseitute hi an ni.
Forest Conservation Act hi eng nge?: Forest Conservation Act, 1980 chu ram leh ramngawte nasa lutuka sawisak chereuna lak atanga ramngaw leh thing dinna hmun ramte venna tur dan, Parliament of India-in a siam a ni. He dan hi India ram pum, former Jammu & Kashmir tih lohah chuan hman tura tih a ni. Forest Conservation Act-in a sawi uar ber chu ramngaw siamna tur ni lo, project dang reng reng chuan central sawrkar phalna lak a ngai tih a ni.
Forest Clearance chu eng nge?: Ramngaw leh thing din tamna hmuna (a thing phun zawng ni lo) project dang reng reng kal pui dawna hma lakna reng renga central sawrkar phalna hi ‘Forest Clearance’ chu a ni ber.
He Forest Clearance hi kalkan emaw, hel emaw a theih loh a, dil ngei a ngai a, phalna hmuh ngei a ngai bawk. Hei hi Forest Conservation Act, 1980 Section 2 ah hian phut tlat a ni. Hei hi cenral leh state a hmasawnna duh hmanhmawhte tan chuan mitmim a ni ve thei bawk a ni. Forest Clearance atana sum sen ngaite hi central kut a lut leh tur a ni tih chiang bawk ila. Thik loh tur thik hi awm ve thei a ni a.
Eng nge kan harsatna chu?: Kan harsatna ber pakhat chu development leh pawisa duh avangte hian, a bik takin central sawrkarah project hrang hrang kan dil a, heng project kan dil leh duhte an thlir laiin, Forest Clearance neih dan tur an ngaihtuah peih lo a. Namnul theih emaw an ti a, an ngaihtuah duh lo a, pumpelh phet an tum thin hi a ni. Hmasawnna hi kan mamawh a, ram hmangaihtute tan chuan vei tur a ni reng a. Mahse a kal dan tur ni loa anmahni duh zawng anga kalpui an tum hi a fuh lo hle a ni.
Eng kan ti ta nge ni?: India ram zau takah hian State thenkhat Forest-in a khuh chin ( Forest Cover) hi a pung a, thenkhatah a tlahniam chak deuh thin a. Hei hi tu emaw titi thiam ang deuh rin sawi mai a ni lo. Forest Survey of India, Dehradun in Satellite thlalak nen a siam a ni a. Rintlakah an ngai vek a ni. Kum khat danah an chhiar (survey) thin a, 2019-2021 chhung pawh hian Mizoram hi a hloh hnem zingah kan tel a, intih theihna chi a ni lo. Sq km 186 ngawt kan hloh. NE State-ah pawh a rethei leh development kal muanna ber kan nih mek hi.
Pumpelh tum duh suh u, In thei chuang lo ang: Nikum, 2021 Nov 29th khan Delhi Metro line chungchang a Judgement a tih chhuahah chuan, Supreme Court of India chuan Forest Conservation Act , 1980-in a phut angin Delhi Metro ho chu Forest Clearance Reserve Forest kher ni loah pawh la turin a ti. Mizoramah phei chuan Reserved Forest awmsa cancel chawp a, hmasawnna duh vang em em ni loin, 15% of compensation cess kan deduct hnuah pawh, a bak insem kan tum em ni le. Pumpelh tum vak vak lo mai ang u. NHIDCL officials-politician-official-illegal land pass holders nexus te hi awm thei a ni em le?
Tlangkawmna: Forest dept-a thawk pension tawhin thu pakhat min kamkeu ka huat em em chu: “Hmasawnna hna lian tham ruahmanna a awm hian, high level kan han meeting a, Forest lam khan in beng lo chhu ngawng ula an ti thin nia!” tih a ni. Rapthlakin! An thuneihna hmanga chhut ngawntir an lo tum thin a nih chuan an chhu ngawng thiang lo tih hi hre mawlh rawh se. Tunlai khawvelah phei chuan an chhu ngawng thiang tawh lo lehzual! Tih luihnaa an chhutngawn tir emaw, department of Environment Forest & Climate Change a thawkte inthlahdah vang emaw a nih chuan mahni ram leh hnam, tun hun leh hun lo la kal tur thlir phak, thalai fing leh fel tak tak, hmasawnna dik leh tlo hria an tam tawh lutuk!
Hei hi kan ram neihchhun a ni a, hei lo hi ram dang kan nei lo. Chu pawh chu kan tu leh fa, kan tuchhuan lo awm zel turte ta kan luah hawh mai mai a ni a. He kan ram luah hawha leilung leh a hausakna thing lei mau, luite lui lian, nungcha tinrengte venhima humhalh hi kan mawhphurhna a ni.