Resolution pahnih
Mizoram budget session kal mekah, nimin khan Mizoram rorelna in sang bera thil thleng ngai lo a thleng a. Private member resolution pahnih, chu pawh opposition member atanga lut, chu ni khat thilthuah a pahnihin pawm (adopted) a ni a. Hetiang hi Assembly session-ah a thlen vawikhatna nia an hriat thu House member thenkhat bakah, Assembly Speaker pawhin a sawi a ni.
Hei hian a entir pakhat chu, a tul hunah chuan ruling leh opposition nihna dahthain, ram leh hnam tana thil pawimawh, hnam hnuk khawih thilah chuan kawi kawm thin ang thapin roreltute an tangrual thei, tih hi a ni awm e.
Resolution hmasa zawk, ZLP member Lalchhuanthanga putluh, “Kawngpui tha leh building tha kan neih theih nan tun aia ulukin hna thawh ni rawh se” tih chu engmah siamrem (amendment) awm lovin pawm a ni a.
He resolution pawm tak atanga thil lo lang ta chu— kan rama kawngpuite hi a tha rei ngai lo va, tun aia tha zawk kawngpui nei tur chuan, tunhma aia uluk zawka hna thawh a ngai a; chutiang bawkin kan building te pawh hi a sak a tha lo a, tun aia uluk zawka hna thawh a ngai a ni, tih hi a ni a. Kan rama kawngpui siam leh building sak hna a that loh thinzia House-ah nemngheh a ni, tihna a ni bawk awm e.
Resolution puluttu hian kawng chhiat chhanah lung a chang tawk lo nia sawi a nih avangin state dang atangin lung chang chawk luh a nih pawhin kan kawng a that phah ve chuang lo a, ruahtui chhuanlam chungchangah pawh, keini aia ruahtui ngah zawk state dangin kawngpui tha an nei thei tho a, motor lian rah chhiat vang nia sawi chungchangah pawh, keini state aia motor lian nei ngah zawkah pawh kawngpui tha an nei thei tho, tiin a sawi a. Kawngpui tha kan neih theih lohna chhan pathum a sawi chhuak a, chungte chu corruption nasat vang leh restricted tender vang te, mi hminga hna thawhtir bakah hna hralh thin vangte niin a sawi a. Kum kal mekah kawng siamna atana sawrkarin sum a neih chu cheng nuai hlir 1,10,265 a nih thu leh, heng sumte hi State Fund, SEDP, PMGSY, Central Road Fund, NABARD Loan, PM Devine etc.. atanga lutkhawm a nih thu a sawi bawk a. Mizorama kawngpui thui zawng chu Km 5,716.93 a nih thu leh hengte hi national highway, state highway, major district road, other district road, village road leh city road belhkhawm a nih thu a sawi bawk a.
Heta tanga lo lang ta chu, heti zat kawngpui siamna leh enkawlna tur sum (tluklehdingawn 12) a awm chung pawha resolution hnial kalh lova pawm a nih nghal thlap danah hian, kawngpui siam leh building sak hnaah hian harhtharna kan ngai nasa hle tih a lang ta a ni.
Resolution pahnihna, “Kan ram thenawm Myanmar leh Bangladesh atanga sahimna zawnga kan unau raltlana lo kalte Mizoram sawrkar leh Mizoram mipuiten tha taka kan lo dawngsawng hi a lawmawm kan ti a. A tul ang zela lo tuamhhlawm chhunzawmin an awmna tur leh an mamawhte ngaihtuah zel ni se kan ti” (as amended) tih, Congress member Lalrindika Ralte put luh chungchangah hian, House member-te an inlungrual tha hle a. Khawvel hmun hrang hranga awm darh Zofaten inpui bera an ngaih Mizoram rorel khawl sang berin hetiang resolution a nei thei hian, hnam inpumkhatnaah a thawh hlawk hle dawn tih a lang a, mipuite pawhin kan aiawha rorel tura kan thlanchhuahte thutlukna hi kan thutlukna a ni tih hriaa mahni theihna zawn theuha thahnemngai taka tan kan lo lak a pawimawh dawn hle tih a lang a ni
Resolution pahnih
![](https://theaizawlpost.org/wp-content/uploads/tap_logo-min-large.jpg)