AMC hnuaia Committee on Regulations of Restaurant, Hotel & Hostels chuan Aizawl khawpui chhunga restaurant, hotel leh hostel te endik an tum tih an puang a. An endik turte hi – registration, signboard, bawlhhlawh thliar, eitur siamtute leh hotel/hostel siamtuten faina leh thianghlimna chungchangah dan angin hma an la em tih te a ni.
November chawlhkar hnihna atangin endik hna hi thawh tan tur a ni a, inchinfel ngaite chu November, 2024 chhung hun pek an ni ang a, a hnu lamah chuan dan zawmlote chungah action an la tan dawn a ni.
Mizoram hian municipality kan hmelhriatna a la rei lova, tunah kum 15 hmel a hmu tan chauh a ni a, state dangte nen khaikhin chuan Mizoram municipality chu nausen piang hlim ang chauh a la ni awm e. Heti chung hian khawpui hmasawnna tura AMC hnathawh hi a naupan ngaihtuahin a theuneu bik lo hle; Aizawl khawpui hmelhmang pawh a danglam chak ve hle a ni. Chutih rual chuan, hmasawnna tur erawh a la tam hle. Hmasawnna tur tam tak zingah, a pawimawh hmasa ber chu Dan Kenkawh that hi a ni awm e.
AMC hnuaiah Aizawl khawpui hi Plastic Free City nih tuma hmalakna (2019) lian tak kan hmu tawh a, mahse dan kengkawhtu tur ber khawpui sawrkar AMC hian a nihna tur angin dan an kengkawh mar pat thei lo a; a tir lama hrui pawh-mar kha tunah chuan a dul thui leh tawh hle a, plastic free city hi kan hlat tial tial emaw tih mai tur a ni.
Tuiluankawr lamah hmalakna tur a tam a, tuiluankawr mumal loh avangin leimin/chenna in chim, kawngpui tlahniam etc. a tam em em a. AMC chuan thawkkhat lai khan hma chu a la, kawmkar tuichhe paihnaah tuiluankawr thar engemaw zat chu siam thar pawh a ni nghe nghe, mahse hrui pawh mar kha a dul leh tawh.
Tunah pawh endik tur hmachhawp an nei leh ta mek a, kum 15-a upa AMC hian a thara press conference nei kher lo hian dan zawm leh zawm loh chu endik mawp mawp mai awm tak, press conference ngai leh te tea kan awm hi dan kengkawhtute hrui pawh mar a dul rei tak vang a ni thei ang em? A kaihhnawih health department hnuaia FDA (food & drugs administration wing) lam nena thawhhona tur (ei tur siam kawngah) te, education nena thawhhona tur chi (hostel rules etc) lamah te a awm nual a, hei hi coordination tha tak hnuaia hmalakhona tur chi niin a lang.
AMC tang fan fan.
Restaurant, hotel leh hostel fai leh thianghlim
