Result lian nena season khuh hawng
Manchester City leh Spurs
Inrinni zanah Pep Guardiola hoa intuaithar tum Manchester City chuan si li faia mualneitu Wolverhampton Wanderers sawp chungin season thar bul an tan a; a season hnuhnung pathumah pawh Etihad club tana opening match-a goal hnih lo khung tling vek tawh Erling Haaland chuan goal hnih nen bawk bul a tan leh.
Molineux Stadium, Wolverhampton, Britain-a goal hmahruai leh Norway international goal hmasa zawk ni bawk kha first half minute 34-a a tihluh niin, chawlhlawk hma minute sarih la awmah newcomer pakhat Tijjani Reijnders chuan City goal hnihna thawh ve lehin, first half-ah sihnih faiin mualneitu team-in hma an hruai phawt.
Second half tir lamah Haaland bawkin a goal hnihna khungin, Manchester khaw kawr pawl ha zawk team goal lina chu newcomer dang Rayan Cherki debut goal a ni thung.
Box-to-box midfielder Reijnders hian tun nipui thawt lai hian AC Milan atangin City a pan a, a club thar tana a inlan vawikhatnaah luh hmasak chang nghalin, goal khat a thun bakah City goal hnih dangah thuk takin a inrawlh bawk.
Pep Guardiola team-in season chhe zet an hmangliam a, kum riat chhunga a vawi khatna atan trophy lian tham lak an nei lo a, mahse, season thar bul an tan dan erawh a ni zak mai!
Tottenham Hotspur 3-0 Burnley
Premier League season thar Inrinni zan hmasaberah Spurs-in hnehna lian nen Thomas Frank era an tan ve thei bawk.
Boss thar Frank-a home match hmasaberah Richarlison a vul a, Brazilian hian tan atanga minute 10-na lekah mikhual hmahruaina goal khungin, second half minute 60-ah home team goal hnihna a thawh ve leh.
Tottenham Hotspur Stadium-a goal thumna leh si thum faia Spurs chakna goal ni zui ta hi Richarlison-a goal hnihna luh atanga minute ruk liam ruala counter-attack atanga Brennan Johnson-a thun a ni ve thung.
He inkhelah hian Premier League dan thar hnuaia thil thleng langsar kan hmu a; Burnley keeper Martin Dubravka chuan dan thara second riat aia rei ball manbeh loh tur tih chu bawhchhiain, he dan thar hnuaia hremna (corner kick) chawi hmasaber a ni!
Inrinni zan inkhel dangah Sunderland chuan England top flight-a a kirleh lawmna atan 3-0 ngatin an mikhual West Ham United an hneh a; Aston Villa chuan red card avangin defender Ezri Konsa chan mah se goal awm loin an mikhual Newcastle United lakah 0-0 draw an hlawhchhuak thei hram a; Newcastle United hian hmalam hun chiang lo tak ni chunga tun nipui thawt laia hralhchhuah an tum loh thu an sawi tawh striker Alexander Isak an chhawr lo.
England chhim lam tuifinriat kama inkhel pakhatah Rodrigo Muniz-a last-minute goal hmangin mikhual Fulham pawhin Brighton & Hove Albion lakah 1-1 draw an sualchhuak ve hram bawk.
Result lian nena season khuh hawng Manchester City leh Spurs
