Pathianin Mizote chu rethei taka awm a, hnamdangte thil neih dil reng turin a din loa, retheihna sawimawi chu tawpsan a ngai tawh tih minister B Lalchhanzova chuan a sawi.
Inrinnia Guwahati Mizo Students Union (GMSU) in Guwahati atanga Mizo zirlai chhuak turte thlah paha zirlai lut tharte an lo lawmna an buatsaih a hmanpuinaah B Lalchhanzova chuan, Mizo hnama min dintu leh ram min petu Pathian chuan rethei taka awm a, hnamdangte thil neih dil reng turin min din lo a, mahni kea ding a, hnamdangten an chung en theih tur hnam ni turin a duh a; Mizote kaltlangin Pathianin khawvel hmaah inchawimawi a duh tih sawiin, “Retheihna sawimawi hi tawpsan tawh ila, hnam hausa ni turin kan rilru put dan thlak ngam ang u. Zoram leh hnam tan, thangthar lo awm zel turte tan thil tha hnutchhiah hi intihhmuh tawh ang u,” a ti.
GMSU hi kum 1997-a din niin, tunah hian member inziaklut 292 an awm mek.
Retheihna sawimawi tawpsan ila – B Lalchhanzova
