Rev Dr H Vanlalauva chawl ta
Theology zirna lama mi tangkai, Mizoram Synod moderator hlui Rev Dr H Vanlalauva chu June ni 22 zan khan a boral a, a tukah thlah liam a ni.
June ni 17 khan a pum nawm loh avangin Synod Hospital-ah a inentir a, CT scan tih niin, a pumpuiah bawk a lo awm a, cancer a nih rin avangin Ebenezer Hospital-ah an refer a ni. June ni 21 khan an zai a, a cancer hi rin aiin a lo nasa hman a, a tukah a BP a hniam a, a chau hret hret a, theihtawp chhuaha enkawl a ni chungin Chawlhni zan khan a chawl ta a ni.
Rev Dr H Vanlalauva hi 1948-a piang a ni a, 1981-ah Presbyterian Kohhranah Pro Pastor niin, theology a zir zawm zel a, 1996-ah DTh a zo. 1998 atangin Aizawl Theological College principal a ni a, 2008-ah Synod Moderator a ni.
A pension hnuah pawh Aizawl Theological College-ah hun engemaw chen a thawk a, BSI Aizawl Auxiliary president te pawh a ni tawh a, a hun tawp thleng hian chief translator a ni.
Lehkhabu engemaw zat a ziak a, pariat chu sap tawnga ziah a ni. July ni 5-a chhuah tur “Calvin’s Ecc;esiology in relation to the Mizoram Presbyterian” tih a peih fel hman bawk.
A nupui Lallianpuii’n 2016-ah a boralsan a, a fapa David Lalthangliana chu Kolasib SP a ni mek. Minister hlui H Liansailova hi a u a ni.
Rev Dr H Vanlalauva hi Mizoram chauh ni lovin ram pawnah pawh theology zirna lama hriat hlawh a ni a, Mizoramah pawh mipui ngainat hlawh a ni. Leitan South-a an chenna inah leh biak inah mi thahnem takin an thlahliam.
Rev Dr H Vanlalauva chawl ta
