Revenue minister B Lalchhanzova chuan Land Revenue & Settlement Department hnuaia Assistant Commissioner (Revenue) North thuthmun tura duan Aizawl DC office building Treasury Square cheithat mek chu Nilaini khan a enpui.
Minister chuan LR&S department luah tur DC office building chung ber cheithat mek chu sak zawh thuai a nih theih a beisei tih sawiin, thawhhona tha leh chak zawk neih chhunzawm zel turin a chah a. Sawrkar ruahmanna thar angin District Revenue office chu district tina DC office-ah awm tawh tura tih a ni.
Mizoram sawrkarin e-governance a ngaipawimawh hle tih sawiin, District Revenue office leh DC office hnai taka an thawkho thei tur hian digitalisation lama hma sawn theihna rahbi pawimawh tak a nih a rin thu a sawi a. Kum hnih thum hnuah chuan 100 percent-in file hi digitised a nih a beisei tih a sawi bawk.
Minister hi LR&S commissioner & secretary Vanlalmawia’n a tawiawm a, Aizawl bawrhsap Er. Lalhriatpuia’n lo dawngsawngin, DC office thawkte leh LR&S office-a thawkte nen building cheithat mek hi an enho.
Revenue North thuthmun chei mek
