Hmasawnna hna thawhnaa sum senso tur zat ruahman sa ennawna tih san leh thin chuan a hna zawh hun tur pawhsei a keng tel thin a, heng thil pahnih hi an sawrkar laiin tihbo an tum tih chief minister Lalduhoma chuan a sawi. Synod Social Front hruaitute chuan Thawhtanni khan chief minister hi an hmu a. Eiruk do kawnga Synod-in ruahmanna a neihte an thlen.
Chief minister hian eiruk tibo tur leh eiruk chingte chunga dan anga hma lak a nih theih nana Lok Ayukta an thuamchak chho mek tih a sawi a. India dan tharin a phut ang thlapa CBI hnena general consent an pek thu te, restricted tender chu dan ang thlapa kalpui an tum thu te a lo hrilh.
Revised estimate siam chu project date of completion pawhsei nen a kal kawp duh hle, tiin, “Kan hunah hian heng thil pahnih hi tihbo kan tum. A umzuitu tur mipui huapzo Project Monitoring Committee kan din a. Team pali ah insem darhin endik hna an kalpui mek. Anni’n engkim chipchiar leh uluk taka an endik hnua an remtih sak hnenah chauh project cost revised leh date of completion pawhsei hi kan phalsak dawn a ni,” a ti.
Contract hralh chhawn pawh tihbo an tum a, tunah chuan hralh sawi tur pawh a awm rih loin an hria tih Lalduhoma hian a sawi a. Chutihlaiin contract hi a hmu ngaiin an hmu tluk tluk thei bawk tih sawiin, “Heng thil fel tawk lo awm theite tibo tur hian hma kan la mek,” a ti. Sawrkar chu kohhran thurawn leh zilhna ngaithla turin a inhawng em em tih sawiin, inthlahrung lo turin a chah.
Synod Social Front hruaitute hian, kohhranin tha taka sawrkar thawhpui an duh a. Mipui sawrkar tih ri ringawt pawh a mawi em em rualin, sawrkar kalphungah sawisel tur a awm chuan an sawi hreh dawn lo tih an sawi.
Synod-in corruption do a rel bawhzuiin sawrkara thlen tur chi an neih an thlen tih chief minister hi hrilhin, Lok Ayukta tihchak, loh theih loh chauha restricted tender kalpui, project cost ennawn (revised) tihbo, contract hralh chhawn leh tihbo tha an tih thu an thlen. Heng thil hi sawrkarin kalpui a tumsa leh a kalpui mek an ni tih an hriatin an lawm hle tih an sawi a. Eiruk do tura kohhran huang chhunga hma lak an tum dan an hrilh bawk.
Revised estimate siam tihbo kan tum – Chief minister
