August ni 19, Inrinni khan Manipur-a Zo
hnahthlakte’n kawng an zawh a, ‘Right to freedom of expression min chhuhsak,’ tia lungawi lova kawng hi zawh an ni.
Manipur-a Zo hnahthlak hruaitute’n The Aizawl Post an hrilh danin, tuna an buaina chungchanga awka chhuahtu Zo hnahthlakte chu police case leh court case pek an ni zung zung a, Zo hnahthlakte’n an thiamthu leh dikna an sawiin an lakah FIR thehluh a ni zel bawk. Hemi chungchangah hian India sorkar lakah an lungawi lo a ni.
Churachandpur district-a Zo hnahthlakte intelkhawmna Indegenous Tribal Leaders Forum hruaitu pakhat chuan, “Kan thiamthu kan sawiin police case leh court case min neihtir zung zung a. kan tanhmun kan sawiin an hua a, kan lakah FIR an thehlut zung zung a. Chuvangin right to freedom of expression min chhuhsak a tih loh theih loh,” a ti.
“Kan lakah chauh a ni lo a, hnam dang professor-in kan kan dinhmun an sawi pawhin an hua. Kan history kan sawiin case min pe zung zung mai a ni,” a ti. Voice han nei deuh chuan case an nei zel,” bawk.
Lamka-ah chuan Public Ground atangin Peace Ground thlengin kawng hi an zawh a, km 3 dawn a ni ang. Zo hnahthlakte awmna district dang, Kangpokpi, Chandel leh Tengnoupal-ahte pawh kawng hi an zawh. Mipui an thahnem a, Zo hnahthlak pawl hrang hrang aiawhte’n thu an sawi.
Manipur-ah hian Zo hnahthlakte leh Meitei kar hi a lum reng a, Zirtawpni pawh khan Thawai khuaah an inkap. Hetah hian Zo hnahthlak lamah mi pathumin nunna an chan tih thu dawn a ni.
Thawai hi Kuki khua a ni a, Manipur atanga thu dawn danin, khaw venga ‘duty’-te inthlak lai velin Meitei lamin kal chilhin an kap a ni. Mi pali an duty a, pakhat chu inthlak hun a nih avangin a lo kal che sawn hman a, mi dang pathumte’n nunna an chan ta a ni.
Right to Freedom of Expression min chhuhsak,’ tiin kawngzawh
