Daily Newspaper

Rilru nei taka chet a hun

23

Ramri buai thilah, silaiin min kap a, lo dawh ngawr ngawr theih ni hek lo le, kan lo chhang let lo thei si lo. A vanduai zawkah an tang a, thal thlah hmasatu an nih avangin inthupmawi tumin tih sa loh loh an ti a, thu belh chian dawl lo hmangin khawvel hriatah min puh mualpho an tum a. Mahse, thudik chu tuiek ve hek lo le, min puhna zozai te kha belh chian dawl awm hek lo, thudik chu a dik ang angin a lo lang chhuak leh mai a.

Silaia min kahhlum tuma an beihna a tlawlh a, eibar kawngah min hrek riltam tumin hma an la leh mek a. Kan thenawm state, a nihna takah chuan kan State Inpui tia koh theih Assam state hian ramri buai chinfel tuma hma lak aimahin, min tihnawmnah hi an rilru em ni tih turin min kahhlum an tum hnuah kan hrawkhrawl chhah tumin an hmanhlel zui leh a. Chutih laiin sawrkar laipui lam lahin, ‘chawh tak rawh se’ ti niawm takin thu leh hla an rawn nei tha duh lo hle lehnghal. Hei hi sawrkar laipui leh kan thenawm state Assam-in kan laka an rilru put dan a nih chuan, Mizoram mipui hian rilru nei taka chet kan lak a hun ve ta niin a lang.

Mahni intodelh hi hmasawnna rahbi pawimawh tak a nih thu kan inhrilh nasa tawh hle a. Mizoram state sawrkar lo piang tawh zawng zawngte khan ‘mahni intodelh’ kha an tlangaupui vek. Mahse, eng sawrkar mahin Mizoram hi mahni intodelh state-ah an la hlangkai thei lo. A chang phei chuan, kan state intodelh loh chhan hi mipuite thiamloh zawk ang dawn dawna ngaih theih turin ram hruaitute tawngkam ngaihthlak tur a awm leh zauh thin.

Tunah hian, Assam lamin tharum hmanga min rawn tihtlawm tuma hma an lakna a tlawlh tak avanga economic blockade an nei zui hi, keini lam chuan eng he huah ngaihsak lo ila, tawrh a tul a nih pawha tawrh inhuam chunga ngawihsan hmak hi tum ta zawk ila. Chutih rual erawh chuan, hripui kaihhnawih damdawi leh thildang mamawh an hrek te erawh, an rawn chhuah thei lo a nih chuan tharum hmanga zuk lakchhuah hi kan tum hial pawh a tha phian maithei; virus laka himna tur dang bettu an nih avangin engtizawng pawhin lakchhuah tumin bei pawh ni ila, khawvelin min thiam em em ang.

Hetiang hun khirh hi, thufingin. ‘tawrhna phena malsawmna’ a lo tih angin, mahni intodelh tura min nawrkaltu atan hman tangkai i tum hlauh ang u; rilru nei taka kan chet hi a hun ve takzet tawh a ni e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy