Daily Newspaper

RINNA LEH BEISEINAIN

13

-Raizawka, Camp: ZTN

China thufing pakhat chuan, ‘Khaw thim ânchhia lawh suh, bati chhi mai zawk rawh’ a ti a. Bati hi hma lam huna beiseina nung nei tura infuihna leh entirna atan an hmang thin a ni awm e. Nurse-ho pawh hian an zirna tawp dawnah inthlahna leh dahnghehna hun an hman laiin bati an chhi fo a, chu chu mi dang tâna nunna êng leh beiseina petu an ni tih entirna a ni ber awm e. Beiseina chuan nun a tinuam a, ipikna ata thawvenna min thlen thei thin. Beiseina nei lo mihring tluka khawngaihthlak an awm lo. Retheihna leh manganna-in kan nun a tih buaia a delh beh tlat lai pawhin beiseina chuan chakna min pe thar leh a, hma lam huna êng de vê vê chu min hmuhtir a, chu chuan kan tha thum mek chu a thahrùi leh thin. Gerard Berghoef leh Lester DeKoster te thian dun chuan an lehkhabu inziah tawm pakhatah chuan, ‘Beiseina tel lova dam hi hringnun ânchhia a ni,’ an ti tawl mai!

Tirhkoh Petera chuan, Isua Krista thawhlehna avanga Pathianin beiseina nung nei tura min hrin leh thu a sawi (1 Pet. 1.3). Pathian meuh pawhin beiseina nei turin a hrinin min hring hial a nih si chuan, beidawnga indawm kun mai tur kan ni lo ang. Mihring thinlungah hian beidawnna leh beiseina chu a awm reng a. Kan dah sân leh kan hman duh zawk zawk chu hmang mai tur kan ni. Mi beidawngte’n hma lam hun hlimawm thleng zo loin an nunna hlu tak an chân fo a, beiseina nung neitute erawh chuan tahna ruamah tuihna awmna siamin, thim zingah pawh an beiseina meichher de vê vê chu chhem alh hram an tum thung a, a tawpah beiseina meisi chu meipuiah chantirin thimna an hneh leh thin. Krista vanga nun hlan hial pawh ngamtute hian thih an chak ngawih ngawih bik vang ni loin, thih hnu piah lama thih tawh lohna nun hlimawm chu an thinlunga beiseina nung reng avanga an hmuh tlat avangin thih an hlau lo mai zawk a ni. Khawvela mi ropui leh rothap ber berte pawh hi beidawnna-in a hneh theih loh beiseina nung neitute an ni fo.

Kan tunlai khawvel boruak her vêl kârah hian thawpik leh beidawngin i awm thin em? Hma lam hun hlimawm leh nuam aiin hma lam huna thim thuah hnih lo thleng tura an sawi fote hian i nun a tizîng chûk thin em le? Rinna Pa ti hiala koh hlawh Abrahama kha thlir la, ani chuan beisei awm a awm loh hnuah pawh a beisei tlat ang mai khan, he khawvel chhiatna kârah hian buaina chhum kâra ni êng mawi tak lo chhuak tur chu rinna nen beisei ve tlat ang che. Chu i beiseina tihlawhtling tur chuan rinna nei la, beiseina i neih nasatzia ang zela i beiseina a taka chantir tura i tâna awm reng hi theihnghilh suh – Pathian ngei chu.

Hripui lêng leh khuarel chhiatna thleng mêk kara, min khuhtu zân thimte chu a chhah tial tial nia a lan lai te, beiseina reng awm lo ang hiala khawvelin min hrilh mek lai te leh hmangaihna meuh pawh a dâi zo ta ni hiala thâwm thang ri a rin lai hian, rinna leh beiseina nung hming chhalin he thu hi ka chhiah nang che :-

Insi loin indî rih i la,
Invuan loin thinlung inchelh rih se,
Sakruang buan ang pawm loin –
Thinlung inpawmtawn rih i la,
Ka dam nân min hlat la, i dam nân kiang rih i la,
Damna dawihlo awm lo natna hi a reh tikah,
Khawvel parmâwiah chûang dûnin,
I vul dûn leh rial rial ang aw.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy