Tuilian turu takin a tihbuai mek Brazilian state Rio Grande do Sul ah chuan ruah a sur nasat leh avangin tui a len belh leh a.
Taquari leh Cai river te chuan an kuang luangliamin chu chuan tuilian nasa zawk a thlen belh leh mek a ni.
Tuilian avang hian mi maktaduai chanve chuang chu an chenna in chhuahsana siamin mi 147 laiin nunna an chanphah tawh bawk a.
Rescue workers te chuan chhanchhuah hna thawk mekin theihtawp an chhuah mek a ni.
Taquari leh Cai luilian zual hian hlauhthawnna a siam nasa a, a chhan chu an pahnih hian Guaiba a luanglut niin Guaiba lian chuan state capital Porto Alegre ah tuilian nasa lutuk a thlen mek a ni.
Porto Alegre khawpui tam zawk mi maktaduai 1.5 vel chenna chu tuiin a chim mek a, historic centre-te chu tuilian hian a khawih nasa zual bawk.
Sipai te chuan lawng hmangin chhanchhuah tur an zawng a, chutihlaiin rukru vaiin hma an la bawk.
Brazil president Luiz Inacio Lula da Silva chuan Chile a tlawh tur pawh tikhawtlaiin sorkar official-te nen hmalak zel dan tur an sawiho va. President chuan infrastructure te dinthar leh nan emergency fund pekchhuah a nih tur thu a sawi bawk.
Porto Alegre kawtthler te chu tuilianin a chim nasa hle a, tui chim chin hi 10m laia sang nia sawi a ni bawk a. Lawng te te hmangin chhanchhuah hna kalpui a ni.
Tuilian hi April thla chawhnu lam atanga ruahsur nasa kal zelin a thlen a ni a, Meteorologist te chuan May thlatir chu kum 60 chhunga Porto Alegre hnawn ber tum tiin an sawi.
ClimaMeter a researchers te weather extreme zirchiangtute chuan Porto Alegre leh a chehhvel chu climate change avanga tuar nasa thei ber ber tiin an sawi
Rio Grande do Sul-ah tuilian zual zel
![](https://theaizawlpost.org/wp-content/uploads/Clipboard01-959.jpg)