Mizo Students’ Union-in RIPANS hnalak chungchanga hma an lakna kalmekah Nilaini khan Aizawl bawrhsap Er Lalhriatpuia kaihhruaiin RIPANS hotute nen an inbia.
Kumin June 25 khan RIPANS-in employment notice an chhuah a, post 14 awmah scheduled tribe quota seat khat chauh dah a ni chu MSU Gen. Hqrs. chuan dahbelh turin a ngen. RIPANS hotute hian central hotute dawrin Department of Personnel and Training (DOPT) ah file hi a lut tawh a, MSU chu lo nghak hram turin an ngen.
DOPT insiamrem lai a nih avangin MSU chuan zahawm a ti a, hemi chhunga hnalak dang awm reng rengah local preference duhsak bik nise; RIPANS-in employment notice a chhuaha post 14-a unreserved post 4 dahah pawh ram leilungfate ngei lak nise an ti.
MSU chuan RIPANS Hospital din tura hnalak chungchanga circular chhuaka NORCET hmanga hnalak tura chhuah a ni chu a duh lo hle tih a sawi a. NORCET hmanga hnalak a nih chuan hnamdang mi tamtak an lo lut dawn a, damlote tan harsatna tamtak thlentu a nih dawn avang leh ram leilungfate kan ram ngeia kan chanvo leh hmasawnna tur rahbehna a ni, tiin, NORCET hmanga hnalak a nih chuan a tawp thlenga an dodal tur thu an sawi.
RIPANS director chuan NORCET chungchanga central an dawrnaah Mizo mipui tana tha ber tura thuthlukna an siam ngei a beisei tih a sawi a ni.
RIPANS admission chungchanga kumtina neih thin RIPANS Common Entrance Test (RCET) tihtawp a ni chu MSU chuan hmang chhunzawm turin a ngen a. SMATEE leh NEET chauh hmang loa RCET hmang leh turin an nawr. Director chuan thutkhawmnaah a lo thlen tur thu leh a tlang ngei a rin thu a sawi a ni.
RIPANS hna lakah a ram mi duhsak theihna turin indawr
