Road Safety Week hmang tan
Kumtin Mizoram puma an tih thin angin, Zoram Drivers’ Union chuan tunkar chhung hian ‘Lirthei Khalh Fimkhurna Hapta’ an hmang dawn a. Mipui, a bikin lirthei khalhtute fimkhur a tul zia a zau thei anga hrilh an ni ang.
Thawhlehni zinga he Hapta hawngtu Transport minister Vanlalhlana chuan Road Safety Week hi mipui hnena fimkhur ngaihna, an himna tur hriattir nawnna hun a ni dawn tih a sawi. Lirthei chu mihring tan a pawimawh a, a khalhtute fimkhur loh vang emaw puitlin tawk loh vang emaw in chhungkaw tam takin vanduaina, thihna hial an tawh phah thin, tiin, fimkhur tura inhrilh thar a tul tih a sawi a ni.
Road safety chu lirthei khaltute tan chauh niloin, kawngpui hmangtu zawng zawng – driver, passenger leh kea kalte a huam vek a ni tih hre thar turin mipui a chah bawk.
“Sawrkarin infrastructure tha zawk siamin, dan tharte duangin a lekkawh lamah tan la mah se, kawngpui hmangtuten an thlawp si loh chuan, him zawk tura kan hmalakna hian awmzia a nei thui lo thin. Kan thiltih hian keimah chauh ni lo, midang, mi chhungkua thlengin thui tak a nghawng thei a ni tih hria ang u,” Vanlalhlana hian a ti.
Kumina Road Safety Week thupui atan “Fimkhur la, nun Chhanhim rawh” tih hman a ni a. December 3 thleng a awh ang.
Road Safety Week hmang tan
