China khawchhak lama Zhejiang University kutchhuak, robot ke pali nei, White Rhino an tih chuan second 16.33 chhungin meter 100 a thui a tlan thleng hman a, record a siam. A hmaah robot ke pali tlan chak ber record chu Republic of Korea-a an siam, Hound an tih niin, second 19.87 chhungin meter 100 a tlan thleng hman ve thung.
Robot hi tlan chak viau mah se mihring chu a la khan lo hle a, mihring zinga meter 100 tlan thleng rang ber record ding lai chu 2009-a Berlin a Usain Bolt siam niin, second 9.58 chhungin meter 100 a tlan thleng hman.
White Rhino hi Zhejiang University-a Center for X-Mechanics, School of Aeronautics and Astronautics leh Hangzhou Global Scientific & Technological Innovation Center te siam a ni a, record pawh hi Zhejiang province khawpui Hangzou-a an test site a siam a ni bawk.
He project-a an hotu Professor Wang Hongtao chuan project hautak tak a nih thu sawiin, meter 100 chak taka tlan chuan robot power leh speed mai bakah robot chu kawng hrang hrangin a nghetin a in-control tha em tih te enna a ni nghal a, a hriatna leh thil chhut thiamna thlenga enna a nih vek avangin a hautak hle niin a sawi.
White Rhino ang chi robot te hi nakinah chuan kawng hrang hranga hman tangkai theih an la ni dawn tih sawiin, chhiatrupna thlenna hmuna chhanchhuah hna thawk tur te, kal khan mumal lo chhengchhe tak tak kara thil thiar vel nana tangkai tak an la ni dawn tiin, “Tlan chak mai bakah, a tlan chakna chu chhawr tangkai theih tura duan a ni ang,” a ti.
Robot ke pali nei zinga tlan chak ber White Rhino
