Kumina Rock & Roll Hall of Fame-a lak luh turte chu an rama Thawhtanni zan, keini tana Thawhlehni tuk khan American Idol show-ah an puang ta a, tun hi kum thum chhung a zawnin inductee-te he show kaltlanga an puanna a ni ta a, nomination artist 17 atangin lak luh tura thlan te chu November ni 14-ah induction ceremony neiin lak luh an ni ang.
Kumina Rock & Roll Hall of Fame-a lak luh turte chu- pop-rocker Phil Collins; New Wave punk Billy Idol; heavy metal gods Iron Maiden; post-punk atanga dance lama inlet Joy Division/New Order; Britpop icons Oasis; R&B group Sade; R&B legend Luther Vandross; hip-hop collective Wu-Tang Clan; Queen of salsa Celia Cruz; Afrobeat chherchhuaktu Fela Kuti; hip-hop huang zauhtu Queen Latifah; rap pioneer MC Lyte; Country rock godfather Gram Parsons te an ni a, anni bakah hian songwriter leh producer lam atangin Linda Creed, Arif Mardin, Jimmy Miller, Rick Rubin leh Ed Sullivan te an tel bawk.
Rock & Roll Hall of Fame a lak luh tur te hi a thlangtu ten ballot hmangin an thlang thin a, thlan theih tura chhawp chhuah, nomination a awm thin a, nomination a lang thei tur hian artist ten an commercial record hmasa ber an tlangzarh atanga kum 25 a tlin phawt a ngai, chutah pawh board-in nomination-a lang tur pawh hi an thlifiam leh hmasa thin a ni.
Class of 2026 a hming lang pariat chu mitthi tawh an ni a, Luther Vandross (died in 2005), Celia Cruz (2003), Fela Kuti (1997), Gram Parsons (1973), Linda Creed (1986), Arif Mardin (2006), Jimmy Miller (1994) leh Ed Sullivan (1974) te an ni. Parsons hi kum 26 mi chauh niin, overdose avangin a thi a, tuna Rock Hall of lak luh tur mitthi tawh zinga damrei lo ber a ni a, mitthi zinga upa ber chu Cruz niin, kum 77 mi niin cancer avangin a thi.
Kumin hian nomination a lang zinga zaitham lar tak tak lak luh tura thlan tak loh an awm nual a, chung zingah chuan The Black Crowes, Jeff Buckley, Mariah Carey, Melissa Etheridge, Lauryn Hill, INXS, New Edition, P!NK leh Shakira te pawh an tel.
Rock & Roll Hall of Fame Class of 2026 an puang
